Bu gün beynəlxalq təşkilatlar qaçqınlıq problemini yaradan səbəblərdən çox nəticələrə köklənib. İllər üzrə artan statistikanı görürüksə, demək qlobal yanaşmada da dəyişiklər edilməlidir.
AZXEBER.COM Trend-ə istinadən xəbər verir ki, bunu Dövlət Miqrasiya Xidmətinəin rəisi Vüsal Hüseynov Ümumdünya Qaçqınlar Gününə həsr olunmuş tədbirdə deyib.
O bildirib ki, vəziyyətin əsas səbəblərindən biri də ikili yanaşmalar, münaqişələr, güc mərkəzlərinin bu məsələyə laqeyd yanaşmasıdır. V.Hüseynov qeyd edib ki, qlobal səviyyədə səylər nə dərəcədə əhəmiyyətlidirsə, yerli səviyyədə də yanaşma çox əhəmiyyətlidir:
"Burada cəmiyyətin bütün üzvlərinin səyləri çox əhəmiyyətlidir. Ölkəmizdə bu sahədə əlaqələndirmə və koordinasiya çox yüksək səviyyədə tətbiq olunub. Azərbaycan qaçqınlarla bağlı problemin bir qismini həll edib. Bu bir təcrübədir, ancaq təəssüf ki, bu problemlər sosial məsələlərin həlli ilə bitmir. Biz bu şəxslərin öz ölkələrinə qayıtmasına fokuslaşmalıyıq".
V. Hüseynov bildirib ki, Azərbaycan digər ölkələrdən gələn qaçqınlara da yardım edir. "Bu şəxslərin saxlanması, onlara ilkin yardımların göstərilməsi, təhsil, sosial məsələləri dövlətin diqqətindədir. Heç bir şəxs arzu və istəyi ilə qaçqın olmur, onun bu vəziyyətdən çıxması özü ilə mümkün olmur. Hesab edirəm ki, bu insanlar üçün ümid beynəlxalq təşkilatlar, yanaşmadır. Ümid real nəticələrə gətirə bilər".
