Vyetnam Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyini yüksək qiymətləndirir və ölkənin təşkilatın fəaliyyətinə verdiyi töhfələri təqdir edir.
Bunu Vyetnam Sosialist Respublikasının vitse-prezidenti Vo Thi An Suan AQEM-in 7-ci Zirvə Görüşünün plenar iclasında deyib.
O bildirib ki, Azərbaycan AQEM-in fəaliyyətinə dəyərli töhfələr verir.
Vyetnamın vitse-prezidenti Bakı Bəyannaməsinin əməkdaşlıq üçün yol xəritəsi rolunu oynadığını vurğulayıb. Onun sözlərinə görə, sənəd inklüzivliyin və rəqəmsallaşmanın təşviqi baxımından əhəmiyyətlidir.
Vo Thi An Suan beynəlxalq hüquqa hörmət edilməsinin vacibliyini qeyd edərək, bütün dövlətləri mövcud problemləri sülh yolu ilə həll etməyə çağırıb.
O, həmçinin iqlim dəyişikliyi və təbii fəlakətlərlə mübarizə sahəsində əməkdaşlığın gücləndirilməsinin vacibliyini vurğulayıb.
Vyetnamın vitse-prezidenti ASEAN ölkələri ilə əlaqələrin genişləndirilməsinin, eləcə də humanitar sahədə əməkdaşlığın gücləndirilməsinin əhəmiyyətini diqqətə çatdırıb.
"Dayanıqlı inkişaf üçün iqtisadi, texnoloji və mədəni əlaqəliliyi gücləndirərək inkişaf prosesinə təkan verməliyik. İnfrastruktur, nəqliyyat və təchizat zəncirləri sahəsində əlaqələri genişləndirməli, təhsil və kadr hazırlığı, elm və texnologiya, innovasiya, rəqəmsal transformasiya, yaşıl keçid və süni intellekt sahələrində əməkdaşlığı dərinləşdirməliyik”,- vitse-prezident vurğulayıb.
