Xəzər Universiteti dünyanın ən yaxşı ali məktəbləri arasındadır
GƏNCLİK
05:55 03.08.2011
3657
Universitetlərin qiymətləndirilməsi dörd nominasiya üzrə aparılıb. Əsas kriteriyalar ali məktəbin dünyada tanınması, elektron məkanda tutduğu çəki, başqaları tərəfindən qiymətləndirilməsi və müasir elmi nəşrlərin çəkisidir.
Ən yaxşı universitetlər sırasına Azərbaycandan yalnız Xəzər Universiteti düşüb - 6211-ci yer. Digər Azərbaycan universitetlərinin heç biri hətta ilk 10 min universitet sırasına düşə bilməyib. İlk 12 min ali məktəb arasında tanınmış Azərbaycan universitetlərindən Bakı Dövlət Universiteti - 11736-cı, Qafqaz Universiteti isə 11895-ci yerdə qərarlaşıb.
Digər MDB ölkələrinə gəlincə, yaxşılar sırasına Gürcüstandan - 1, Ermənistandan - 4, Estoniyadan - 11, Latviyadan - 11, Litvadan - 17, Moldovadan - 4, Belarusdan - 8, Qazaxıstandan - 7, Qırğızıstandan - 3 ali məktəb düşüb.
Reytinqin hazırlanması zamanı universitetlərlə yanaşı dünyanın ən müasir universitet kitabxanaları da müəyyənləşdirilib və 1120 ən yaxşı kitabxana elan edilib. Burada da Azərbaycandan yalnız bir kitabxana - Xəzər Universitetinin kitabxanası yer alıb (892-ci yer).
“Webometriks” reytinqinə görə dünyanın 45 ən yaxşı ali təhsil sistemi də elan olunub. Bu siyahıya ABŞ liderlik edir. Sonrakı yerlərdə Almaniya, Böyük Britaniya, Kanada və digər aparıcı dövlətlər yerləşiblər. Keçmiş Sovetlər Birliyindən bu 45-likdə cəmi iki ölkə var: Estoniya və Rusiya 34-cü yerləri bölüşürlər. Burada Türkiyə 45-ci yerdədir. Ərəb ölkələrindən yalnız Səudiyyə Ərəbistanı (31-ci yer), Afrikadan isə yalnız Cənubi Afrika Respublikası (41-ci) təmsil olunublar.
