İndiyədək Xankəndi şəhərində, Ağdərə və Xocalı rayonlarında 474 obyekt sahibkara icarəyə verilib.
AZXEBER.COM xəbər verir ki, Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən "Report"a verilən məlumata görə, bunu Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov deyib.
Onun sözlərinə görə, bölgədə müxtəlif təyinatlı obyektlər fəaliyyətə başlayıb:
"Digərlərində isə investorlar tərəfindən fəaliyyətə hazırlıq işləri gedir. Hazırkı dövrədək ərazidə investorlar tərəfindən 45.5 milyon manata yaxın investisiyanın reallaşdırılması baş tutub".
S.Qəhrəmanov bildirib ki, fəaliyyətə başlamış obyektlər üzrə 2 minə yaxın şəxs işlə təmin olunub:
"Mövcud müqavilələr üzrə digər obyektlər fəaliyyətə başladıqdan sonra iş yerlərinin sayı 5 minə çatacaq. İqtisadi uğurların əldə edilməsində, dövlətin işğaldan azad edilmiş ərazilərdə tətbiq etdiyi güzəşt mexanizmləri də əhəmiyyətli rol oynayır. Vergi Məcəlləsinə əsasən işğaldan azad olunmuş ərazinin rezidentləri 2023-cü ilin yanvarın 1-dən etibarən 10 il müddətinə gəlir və əmlak, torpaq və sadələşdirilmiş vergidən azad ediliblər".
S.Qəhrəmanov onu da qeyd edib ki, bu təşviq mexanizmləri, Qarabağın iqtisadiyyatının bərpası prosesinə yerli investorlarla yanaşı xarici investorların da cəlb edilməsinə şərait yaradır: "Bu baxımdan işğaldan azad olunmuş ərazilərdə investisiya fəaliyyəti üçün yaradılmış əlverişli şərait və təşviq mexanizmləri haqda xarici investorların məlumatlandırılması istiqamətində xaricdəki diplomatik nümayəndəliklərlə birgə əməkdaşlığa da maraqlıyıq".
