Ancaq bizdə elə ixtisaslar var ki, bu ixtisaslar üzrə xaricdə təhsil almaq olduqca vacibdi
Xaricdə təhsil proqramının dayandırılması kifayət qədər aktual bir məsələyə çevrilib.
2016-cı ildə bu prosesin ləğv olunması xaricdə təhsil almaq istəyənlərin narahatlığına səbəb olub. Təhsil ekspertləri, həmçinin millət vəkilləri hesab edir ki, ölkəmizdə savadlı kadrlara ehtiyac var.
Buna görə də istedadlı gənclərin təhsil alması davam etdirilməlidir.
Deputat Qüdrət Həsənquliyev Milli Məclisin payız sessiyasının ilk iclasında bu barədə danışıb. Onun sözlərinə görə, Azərbaycana yüksək ixtisaslı kadrlar lazımdır: "Xüsusi bir qanun layihəsi qəbul etmək lazımdır. Biz yaxın 10 ildə hər il heç olmasa, 100 istedadlı tələbəni xarici ölkələrin yüksək ali təhsil müəssisələrinə göndərməliyik. Azərbaycanda çox yüksək ixtisaslı hüquqşünaslara ehtiyac var”.
Təhsil eksperti Məlahət Mürşüdlü isə "Şərq”ə açıqlamasında bu prosesin ləğvini iqtisadi əsaslarla əlaqələndirib. Onun sözlərinə görə, dolların bahalaşması səbəblərdən biri ola bilər: "Hər bir tələbə üçün dövlət hesabından minlərlə dollar ödənilirdi. Görünür, belə çətinliklərə görə bu qərar qəbul edilib. Dolların bahalaşması xaricdə təhsil proqramının dayandırılmasına səbəb ola bilər. Bizdə elə ixtisaslar var ki, bu ixtisaslar üzrə xaricdə təhsil almaq olduqca vacibdi. Ölkəmizdə həmin sahə üzrə çatışmayan mütəxəssislərin yetişdirilməsi mühüm hadisədi. Düşünürəm ki, araşdırmalar aparılmalı və əsaslı səbəblər göstərilməliydi. Daha sonra isə xaricdə təhsilin ləğv olunması addımı atılmalı idi. Bütün müasir tələblərə cavab verən savadlı kadrların yetişdirilməsi hər şeydən əvvəl ölkəmiz üçün lazımlıdır”.
