"Hazırda ölkəmizdə ciddi karantin rejimi davam edir və müddət 31 may tarixinədək uzadılıb. Bu tarixədək, digər ölkələrə gediş-gəliş müvəqqəti olaraq dayandırılıb. Buna baxmayaraq, xarici ölkələrdəki vətəndaşlarımızın ölkəmizə geri qaytarılması istiqamətində addımlar atılır".
AZXEBER.COM xəbər verir ki, bu sözləri Azərbaycan Televiziyasının (AzTV) "Koronavirus İnfo" verilişində Xarici İşlər Nazirliyinin Mətbuat Xidməti İdarəsinin rəisi Leyla Abdullayeva deyib. O, bildirib ki, xaricdə qalan vətəndaşlarımız xüsusi çarter reysi ilə ölkəmizə təxliyyə edilirlər: "Rusiyadan bir qrup vətəndaşımız təxliyə edildi. Bu günlərdə Rusiyadan yeni qrup geri qaytarılacaq. Yaxın günlərdə digər ölkələrdən də, azərbaycanlıların hissə-hissə, mərhələlərlə ölkəmizə geri dönüşü həyata keçiriləcək". L.Abdullayeva onu da deyib ki, Azərbaycana təxliyyə edilən vətəndaşlar məcburi şəkildə və dövlət hesabına karantin rejimində saxlanılır. Geri qaytarılmanın necə həyata keçirilməsi məsələsinə gəldikdə isə XİN rəsmisi qeyd edib ki, təxliyyə planları Azərbaycanda infeksiyanın yayılması vəziyyəti və karantin yerlərinin hazırlığı ilə əlaqəli həyata keçirilir.
