Jurnalist Xədicə İsmayılın “Varşava rəzaləti”nə yönəlik ictimai qınaq səngimir.
Xəbər verdiyimiz kimi sentyabrın 23-də Polşanın paytaxtı Varşavada təşkil olunan ATƏT-in zirvə toplantısına qatılan jurnalist Xədicə İsmayıl tədbirdəki ermənilərlə həmrəylik sərgiləyərək Azərbaycan nümayəndəsinin çıxışına mane olmağa çalışıb.
Toplantıda iştirak edən Azərbaycan Demokratiya və İnsan Haqları İnstitutunun rəhbəri Əhməd Şahidov Cənubi Qafqaz ölkələrində sərbəst toplaşmaq azadlığı barədə çıxışa başlayanda X.İsmayıl 10-a yaxın erməni dostu ilə eyni vxtda məruzəçinin arxasında və arxalarını ona çevirərək düzülməklə, diqqəti mövzudan yayındırmağa cəhd ediblər.
Bununla belə, X.İsmayıl və onun erməni həmfikirlərinin “arxaçevirmə” aksiyasına baxmayaraq, Ə.Şahidov çıxışını təmkinlə davam etdirib və Ermənistan hakimiyyətini qeyri-insani mahiyyətini açıb göstərib.
X.İsmayılın ermənilərlə birgə belə bir hərəkətə yol verməsini Gün.Az-a şərh edən Sosial-Demokrat Partiyasının (ASDP) sədri Araz Əlizadə adıçəkilən jurnalist üçün vətən və xalq anlayışının çoxdan yox olduğunu, buna görə də onun Azərbaycan əleyhinə istənilən davranışının təəccüb doğurmadığını bildirib:
“Əslində, bu hərəkət birinci növbədə həmin adamın səviyyəsini göstərir. Normal və tərbiyəli insan heç kimə arxasını çevirmir.
Başqa bir tərəfdən, Xədicə bu hərəkəti ilə Azərbaycandan olan məruzəçiyə yox, elə ölkəmizin özünə düşmən münasibətinin göstəricisidir.
Şəxsən mən buna təəccüblənmirəm – vətəni, xalqı pula satan adamlardan bundan başqa nə gözləmək olar ki?
Dəhəşətlisi budur ki, keçən il Milli Şura deyilən qurumun prezidentliyə namizədi olmuş Cəmil Həsənli Xədicə kimi adama istinad edib fikir bildirir.
İndi özünüz qiymət verin bunların kimliyinə... Yenə deyirəm, xaricdən aldıqları əmrləri icra edən bu adamlardan hər şey gözləmək olar”.
