'Xəzər Lənkəran' 4 futbolçunu komandadan qovdu

“Xəzər Lənkəran” Avropa Liqasının II təsnifat mərhələsində Hayfa “Makkabi”sinə 0:8 hesablı məğlubiyyətdən sonra heyətlə bağlı islahatlara başlayır. Apasport.az saytının məlumatına görə, lənkəranlılar 2 futbolçunu sıralarından kənarlaşdırıb. Bundan başqa daha 2 oyunçunun bu siyahıya əlavə olunacağı gözlənilir. Belə ki, uelsli baş məşqçi Con Toşak köməkçilərini başına yığaraq, onlarla müəyyən məsələləri müzakirə edir. Bundan sonra konkret futbolçularla bağlı qərar verilməyi nəzərdə tutulmuşdu. Rəhbərlik Toşakla matçdan dərhal sonra görüşərək çalışdırıcının hesabatını dinləyib. Komandamızın bir həftə öncə səfər meydanında 0:2 hesabı ilə məğlub olduğu rəqibə doğma azarkeşlərimizin qarşısında böyük hesabla məğlub olması bəzi futbolçuların peşəkar futbolçuya yaraşmayan şəkildə meydanda mübarizə aparması, klub daxili ab-havanı pozduqları müəyyən olunub. Bunu əsas götürən “Xəzər Lənkəran” bu gün 3 futbolçunu əsas komandadan göndərib. Belə ki, braziliyalı müdafiəçi Eder Bonfim və ispaniyalı qapıçı Toni Doblas əsas komandadan uzaqlaşdırılıb. Göndəriləcək digər futbolçular barədə də ictimaiyyətə məlumat verilməsə də onlardan ikisinin kimliyi böyük ölçüdə bəllidir. Bunlar yarımmüdafiəçilər xorvatiyalı Marin Orsuliç və rumıniyalı Adrian Pitdir. Hazırda Lənkəranda olan komanda az sonra Bakıya yola düşəcək və çempionatımızın ilk turunda “Sumqayıt”la səfər matçına orda hazırlaşacaq.