YAP-çı deputat həmkarını tənqid etdi

10:01 27.07.2011

1342

Bu sözləri 5-ci çağırış ardıcıl Milli Məclisdə təmsil olunan Aqrar siyasət komitəsinin sədri Eldar İbrahimov jurnalistlərlə söhbətində deyib.

Millət vəkili deyib ki, bizdə birpalatalı parlament olduğu üçün deputatların az və çox seçilməsindən asılı olmayaraq senator adlandırılması mümkün deyil: «Məsələn, Böyük Britaniya parlamentinin Bryüs Corc adlı deputatı var idi. Bir müddət də ATƏT Parlament Assambleyasının sədri oldu. Onu hamı tanıyırdı və deyirdi ki, o, parlamentdə anadan olub. Bu adam 40 il idi ki, deputat idi. Bunu deməkdə məqsədim odur ki, deputatlıq, millət vəkilliyi bir sənətdir, o, zehni bir işdir, yaradıcılıqdır. Xalq seçib, sənə etimad göstərirsə, bunun müddəti, yaş senzi də yoxdur və olmamalıdır».

Bununla yanaşı, komitə sədri deyib ki, qanunvericilik işi, yaradıcılığı çox mürəkkəb mexanizmdir və onu bilən adamlar işləməli, millət vəkili olmalıdırlar: «Tez-tez səsləndirilən “parlament dəyişdirilsin, yeni adamlar gəlsin, cavanlaşma getsin” kimi fikirlərin heç cür tərəfdarı deyiləm. Bu işi bilənlərə həvalə etmək lazımdır. Özünüz də görürsünüz, bizim parlamentdə qanun hazırlayanlar kimlərdir – əsasən, komitə sədrləri və sədr müavinləri. Əsas yük onların üzərindədir. Eyni zamanda, bir neçə millət vəkili də bu işlə daha yaxından məşğul olur. Vəssalam! Qalanları qanun yaradıcılığı ilə məşğul olmurlar axı?! Hətta, məşğul olsalar belə, onu tam bilmirlər. Şəxsən mən özüm də 5 il – 1990-95-ci illərdə deputat olarkən heç düz-əməlli qanun yaradıcılığı ilə məşğul olmamışdım. Məhz ötən illərdəki təcrübəm əsasında bu gün qanun yaradıcılığı ilə peşəkar səviyyədə məşğul ola bilirəm. Deputatlıq, qanun yaradıcılığı dərin bir elmdir, sənətdir. Yəni, qanun yazanda hər cümlənin, vergülün, nöqtənin mənası nədir, onu dəqiq bilməlisən və bunu bilən insanlar məhz parlamentdə olmalıdırlar.

Parlamentdə nə qədər təcrübəli adamlar olsa, bir o qədər işin xeyrinədir. Eyni zamanda, bizim komitə yeganə komitədir ki, son 16 ildə 65-66 qanun layihəsi hazırlayıb və onun qəbuluna nail olub. Bu müddət ərzində cəmi bir qanun – dövlət torpaqlarının geri alınması ilə bağlı sənəd Prezident Administrasiyasından gəlib. Düzdür, aqrar sahə ilə bağlı qanunların bəzisi işləməsə də, əksəriyyəti işləyir, keyfiyyətli qanunlardır».