Bu gün Yeni Azərbaycan Partiyası (YAP) Gənclər Birliyinin sədri Seymur Orucov Güləş Federasiyası ilə əməkdaşlıq çərçivəsində görüş keçirdi.
AZXEBER.COM-un xəbərinə görə, federasiyanın baş katibi Əjdər Cəfərovla baş tutan görüşdə əməkdaşlıq haqqında fikir mübadiləsi aparıldı. Belə ki, görüş zamanı çıxış edən Seymur Orucov ölkədə idmana göstərilən qayğı haqda fikirlərini belə ifadə etdi: “Cənab Prezident İlham Əliyev ölkəmizdə bütün idman növlərinə olduğu kimi Güləşə də xüsusi önəm verir. 2012-ci il Prezidentimizin sərəncamı ilə “İdman ili” olunduqdan sonra Azərbaycanda bütün idman növlərinə xüsusi qayğı göstərilməyə başlanıldı. Bunun nəticəsidir ki, gənclərimiz həm regionda, həm də dünyanın mötəbər turnirlərində uğurla çıxış edir ”.
Bu il Londonda keçiriləcək Olimpiadada güləşçilərimizin uğurla çıxış edəcəyini arzu etdiyini vurğulayan Gənclər Birliyinin sədri bunları dedi: “Londonda keçiriləcək Olimpiadaya ümumilikdə veriləcək 108 lisenziyanın 7-ni Azərbaycanlı güləşçilərimiz artıq əldə edib. Biz ümid edirik ki, Olimpiadada idmançılarımız medallar qazanaraq ölkəmizə qayıdacaq. Bütün bu əldə olunan uğurlara görə Güləş Federasiyasının rəhbərliyinə və bu işdə dəstəyi olan bütün insanlara təşəkkür edirəm”Qeyd edək ki, 200 minə yaxın gənci öz ətrafında birləşdirən birliyin tərkibində müxtəlif idman növləri ilə məşğul olanların olduğunu qeyd edən Seymur Orucov güləşə xüsusi dəstək göstərəcəklərini dedi.
