Yaponiya hökuməti "The New York Times" qəzetində ölkənin Rusiya üçün casusluq fəaliyyətlərinin mərkəzlərindən birinə çevrildiyi barədə yayılan iddialardan sonra xarici kəşfiyyat fəaliyyətlərinə qarşı daha sərt tədbirlər görüləcəyini açıqlayıb.
AZXEBER.COM xarici KİV-ə istinadən xəbər verir ki, Yaponiya Nazirlər Kabinetinin Baş katibi Kihara Minoru məsələ ilə bağlı jurnalistlərə açıqlama verib.
O, "The New York Times" qəzetində Rusiyanın Ukraynadakı müharibə ilə bağlı kəşfiyyat məlumatları toplamaq üçün Yaponiyanın casusluqla bağlı qanunvericiliyindəki boşluqlardan istifadə etdiyi barədə yayımlanan xəbərləri şərh etməkdən imtina edib.
Kihara bildirib ki, fərdi hallarla bağlı danışmaq istəməsə də, hökumət sürətlə dəyişən təhlükəsizlik şəraitini nəzərə alaraq xarici kəşfiyyat fəaliyyətlərinə qarşı mübarizəni gücləndirməyin vacibliyini qəbul edir.
Onun sözlərinə görə, Yaponiyanın milli təhlükəsizliyini təhdid edən həssas məlumatların ələ keçirilməsinin qarşısını almaq üçün əks-kəşfiyyat imkanlarının daha da gücləndirilməsi zəruridir.
Qeyd edək ki, "The New York Times" qəzeti Yaponiyanın Rusiyanın casusluq fəaliyyəti üçün əlverişli məkana çevrildiyini iddia edən məqalə dərc etmişdi. Həmin iddialar ölkədə təhlükəsizlik və əks-kəşfiyyat tədbirlərinin gücləndirilməsi ilə bağlı müzakirələrə səbəb olub.
Gülay
