Yaponiya nüvə sənayesinə nəzarət edən tənzimləyici orqanın rəsmisi Çinə səfəri zamanı məxfi məlumatlar olan iş telefonunu itirib.
AZXEBER.COM xəbər verir ki, hələ də tapılmayan smartfonda Nüvə Tənzimləmə Orqanının nüvə təhlükəsizliyi bölməsində çalışan əməkdaşların adları və əlaqə məlumatları olub.
Hadisə ilə bağlı Yaponiya Şəxsi Məlumatların Mühafizəsi Komissiyasına məlumat verilib. Nüvə tənzimləyici qurum açıqlamasında "məlumat sızması ehtimalının istisna edilə bilməyəcəyini” bildirib.
Mənbələrin məlumatına görə, məmur noyabrın 3-də Şanxay hava limanında təhlükəsizlik yoxlamasından keçərkən əl yükündəki əşyaları çıxardığı zaman telefonu itirib. O, cihazın itdiyini yalnız üç gün sonra anlayıb.
Bildirilir ki, telefon əhatə dairəsindən kənarda olduğuna görə ona uzaqdan daxil olmaq, kilidləmək və ya məlumatları silmək mümkün olmayıb.
Nüvə Tənzimləmə Orqanı açıqlayıb ki, təyin olunmuş əməkdaşlara fövqəladə hallarda operativ əlaqə üçün, o cümlədən xarici səfərlər zamanı da iş telefonlarını daim üzərlərində daşımaq tapşırılıb.
Qurum əlavə edib ki, oxşar hadisələrin təkrarlanmaması üçün müvafiq tədbirlər görüləcək və beynəlxalq səfərlər zamanı smartfonların daşınması ilə bağlı qaydalar yenidən nəzərdən keçiriləcək.
Gülay
