Yeni növ koronavirus (COVID-19) infeksiyası əleyhinə istifadə edilən Çin istehsalı olan "SinoVac” peyvəndi təhlükəsiz və effektivdir.
AZXEBER.COM xəbər verir ki, bunu Nazirlər Kabineti yanında Operativ Qərargahın bu gün keçirilən brifinqində Tibbi Ərazi Bölmələrini İdarəetmə Birliyinin (TƏBİB) Xəstəliklərin profilaktikası və kontrolu departamentinin müdiri Yaqut Qarayeva deyib.
O bildirib ki, Azərbaycan "SinoVac” vaksinindən kütləvi şəkildə istifadə edilir: "Guya həmin peyvənd effektsiz olduğu üçün 3-cü doza vaksinasiyada "Pfizer”dən istifadə edilməsi fikri yanlışdır. Şəxsən mən 3-cü doza üçün də "SinoVac ” peyvəndini vurdurmuşam. Bu, mənim seçimimdir. Bir sıra tibb işçiləri isə "Pfizer” vaksini vurdurublar. Yəni, seçim sərbəstdir. Peyvəndlərin təhlükəsizliyi ilə əlaqədar heç bir narahatlığa əsas yoxdur. Təlimatlara nəzarət edilir və vaksinasiya prosesində iştirak edən tibb işçiləri yalnız təlimatlandırıldıqdan sonra işə cəlb edilirlər”.
