Yunanıstan Mülki Aviasiya İdarəsi texniki nasazlıqla əlaqədar ölkənin hava məkanının bu gün saat 16:00-dək bağlı qalacağını açıqlayıb.
AZXEBER.COM-un APA-ya istinadən xəbərinə görə, bazar günü səhər saatlarında Afinanın Uçuş Məlumat Bölgəsində (FIR) yaranan texniki problem səbəbindən Yunanıstan üzrə uçuşlarda gecikmələr müşahidə olunub.
Nasazlıq Afinadakı əsas hava limanı ilə yanaşı, regional hava limanlarında da aviareyslərə təsir göstərib.
Problemin Mülki Aviasiya İdarəsinə tabe olan Afina və Makedoniya Sahə Nəzarət Mərkəzlərinin mərkəzi radio tezlik sistemlərində nasazlıqdan qaynaqlandığı bildirilir. Həmin nəzarət mərkəzlərinə xidmət göstərən tezliklərin fəaliyyətinin dayanması Yunanıstan hava məkanına daxil olan təyyarələrlə əlaqənin pozulmasına səbəb olub.
Texniki nasazlıq Yunanıstanda bütün uçuşlara təsir etsə də, hazırda havada olan təyyarələrlə bağlı əməliyyatları davam etdirilir.
Hava Nəqliyyatına Nəzarət Assosiasiyasının sədri Panayotis Psaros "Kathimerini” qəzetinə açıqlamasında ilkin tədbir olaraq Yunanıstandakı bütün hava limanlarından uçuşların dayandırıldığını, havada olan təyyarələrin təhlükəsiz enişinin təmin edilməsi üçün işlərin aparıldığını deyib.
