Tanınmış hərbi ekspert Üzeyir Cəfərov namizəd olduğu 33 saylı seçki dairəsinin seçiciləri ilə görüşü barədə təəssüratlarını paylaşıb:
"Dəyərli dostlar, hörmətli həmkarlarım!!
Bu gün Xətai rayonunun Əhmədli qəsəbəsindəki "Bakı" kinoteatrında noyabrın 1-də Milli Məclisə keçiriləcək seçkilərlə əlaqədar təbliğat və təşviqat kampaniyası çərçivəsində daha bir yaddaqalan və son dərəcə maraqlı bir görüşümüz oldu. Bu 33 saylı Xətai birinci seçki dairəsindən olan namizədlərə Mərkəzi Seçki Komissiyası (MSK) tərəfindən seçicilərlə görüşmək üçün ayrılan qapalı görüş yerlərindən ən böyü və ən rahatı hesab olunur.
Görüş Azərbaycanın Dövlət Himninin canlı ifa edilməsi və torpaqlarımızın bütövlüyü uğrunda canını qurban vermiş Şəhidlərin ruhunu bir dəqiqəlik sükutla qeyd edilməsi ilə başladı.
Tam səmimi olaraq bildirirəm ki, məni dəstəkləyən ictimaiyyət nümayəndələri, Qarabağ müharibəsinin odundan-alovundan çıxan yüzlərlə cəbhə yoldaşlarımı, orta təhsil aldığım kənd orta məktəbində bərabər oxuduğum sinif yoldaşlarım, eləcə də dairə üzrə yaşayan sakinlərdən bir çoxu mənə həyatımın ən xoşbaxt günlərindən birini yaşatdılar.
Ən təsirlisi isə mənim döyüş komandirim, 2 dəfə "Azərbaycan Bayrağı" ordeninin sahibi, Silahlı Qüvvələrin tarixində ən uğurlu son döyüşlərin memarı və icraçısı olmuş komandirim, ehtiyatda olan polkovnik Şair Ramaldanovun çıxışı oldu. Kinoteatrın zalı inanılmaz sükütla döyüşlərə rəhbərlik edən zabitin çıxışını dinləyirdi. Bütün iştirakçılar şanlı tariximizin ən parlaq səhifəsi olan 1994-cü ilin uğurlu qış əməliyyatları zamanı 23 yaşayış məntəqəmizin erməni qəsbkarlarından azad olunması təntənəsini yenidən yaşamış oldu. Öz çıxışında komandir onun döyüşlər vaxtı müavini kimi mənim də gördüyüm işlərdə geniş bəhs etdi. Uzun illər keçməsinə baxmayaq, özün haqqında belə bir mötəbər görüş zamanı xoş sözlər eşitmək əlbəttə ki, son dərəcə xoş təsir bağışlıyırdı.
Tədbirin ən maraqlı çıxışlarından biri də Qafqaz-Media İctimai Birliyinin rəhbəri, tanınmış ictimai və media adamı Hacı Azadə-Taleh Abbaszadənin çıxışı oldu. Onun arqumentli, çox sərrast fikirləri, o cümlədən bu seçki dairəsindən mənim namizədliyimlə bağlı söylədiyi xoş sözləri eşitmək də həm mənə, həm də tədbir iştrakçılarında xoş ovqat yaratdı.
Qarabağ Qaziləri İctimai Birliyinin sədri hörmətli Etimad Əsədovun, Qarabağ Əlilləri, Şəhid Ailələri Xətai rayon təşkilatının sədri hörmətli Fuad Salahovun, "Polisə Dəstək" İctimai Birliyinin rəhbəri, sabir polis rəisi polkovnik Hacı Şəmsəddin Əliyev, Ümid Partiyasının İcra Aparatının rəhbəri Taleh bəy Əliyev və başqalarının çıxışları mənim yaddaşımdan uzun illər çıxmayacaqdır.
Milli Məclisə 33 saylı Xətai Birinci Seçki Dairəsindən namizəd kimi mən seçicilərimin və döyüşçü dostlarımın, səngər yoldaşlarımın mənə verdiyi arzu və təkliflərə görə onların hər birinə öz dərin minnətdarlığımı bildirdim. İnanıram ki, 2015-ci ilin noyabrın 1-də Azərbaycan Parlamentinə keçiriləcək seçkilər əvvəlki illərdən xeyli fərqli və maraqlı olacaqdır.
Dairə üzrə görüşlərimiz Xətai rayonun bizim seçki dairəmiz üzrə ayrı-ayrı ünvanlarında, daha çox qapı-qapı, məhəllə-məhəllə prinsipi ilə davam edir".
