Türkiyədə kömür şaxtasında baş vermiş partlayış nəticəsində ölənlərin sayı 205 nəfərə çatıb. Bu barədə ölkənin energetika və təbii sərvətlər naziri Taner Yıldız bəyan edib.
Trend-in məlumatına görə, xəbəri "TRT Haber" yayıb. Faciə ilə əlaqədar Türkiyədə üçgünlük matəm elan olunub.
T.Yıldız bundan əvvəl 201 nəfərin öldüyünü, yüzlərlə insanın isə dağıntılar altında qaldığını bildirmişdi.
Nazir qeyd etmişdi ki, qəza vaxtı şaxtada 787 nəfər olub. Hələlik yalnız 363 şaxtaçı xilas edilib.
Partlayış işçilərin növbə dəyişikliyi zamanı olubş Faciə İstanbuldan 250 km cənubda, Manisa vilayətinin Soma şəhərində özəl şaxtalardan birində, yerin təxminən 2 km dərinliyində baş verib.
İlkin ehtimala görə, hadisəyə qısaqapanma səbəb olub, bu da yanğına və partlayışa gətirib çıxarıb. Partlayış yerində xilasetmə işləri aparılır.
Ölənlərin əksəriyyətinin dəm qazından zəhərləndiyi bildirilir. Hazırda xilasedicilər şaxtanı oksigenlə təmin edirlər.
Qeyd edək ki, Türkiyə Statistika İnstitutunun məlumatına görə, son dörd ayda ölkədə iş yerlərində bədbəxt hadisələr nəticəsində 1235 nəfər ölüb, onlardan 103-ü qadınlardır.
