Qidadan zəhərlənmə hallarının qarşısının alınması məqsədilə şadlıq evlərində, istehsal müəssisələrində yoxlamalar aparılır. Xüsusilə ictimai iaşə obyektlərində soyuq qəlyanaltıların saxlanması şəraitnə əməl olunmasına diqqət yetirilir. Səhiyyə Nazirliyinin məlumatına görə, şadlıq evlərindən 5805 yaxma nümunəsi, 81 soyuq qəlyanaltı nümunəsi götürülüb. Yaxma nümunələrinin 84-də mikrobioloji çirklənmə aşkar edilib. Gigiyena və Epidemiologiya Mərkəzinin Qidalanma Gigiyenası Bölməsinin müdiri İmran Abdullayev toylarda, xüsusilə çadır toylarında diqqətli olmağı tövsiyyə edir.
“Əsas çadır toylarında diqqətli olmaq lazımdır. Belə toylarda şərait olmur. Ərzaq xüsusi yerlərdə saxlanılmalıdır. Soyuq qəlyanaltılar adından da göründüyu kimi soyuq yerdə saxlanılmalıdır”, - deyə İmran Abdullayev vurğulayıb.
Ötən həftədən başlayaraq şadlıq evləri sahiblərinə qabaqlayıcı tədbirlərin görülməsi üçün xəbərdarlıq edilib. Hələ ki şadlıq evlərində elə də böyük neqativ hal qeydə alınmayıb. Lakin ilin isti fəslində çirklənmə halları tez-tez baş verdiyindən, zəhərlənmə hadisənin baş verməsi qaçılmazdır. “Profilaktik dezinfeksiyaedici tədbirlər aparılıb. Xüsusi nümunələr, yaxmalar götürürük. Onları analiz etdikdən sonra nəticələrə uyğun müəyyən tədbirlər görülür”, - deyə İmran Abdullayev qeyd edib.
Qeyd edək ki, respublikanın sanitar-epidemioloji xidmət orqanları tərəfindən 2011-ci ilin 5 ayı ərzində yeyinti məhsullarının istehsalı, satışı, saxlanması, daşınması zamanı sanitar norma və qaydalarının tələblərini pozan, o cümlədən laboratoriya müayinələrinin nəticələrinə görə gigiyenik normalara cavab verməyən məhsulları istehsal edən 225 müəssisənin sahibkarı inzibati qaydada cərimə olunub. İnzibati Xətalar Məcələsinə görə, fiziki və hüquqi şəxslər 50 manatdan 200 manata qədər cərimə edilir. Səhiyyə Nazirliyindən verilən məlumata görə, aşkarlanan pozuntulara görə, ümumilikdə 112 obyektin istismarının dayandırılması barədə qərar qəbul edilib, 41 nəfər işdən müvəqqəti kənarlaşdırılıb.
