Cari ilin yanvar ayında Avstraliya çimərliyində köpək balığını sahildən uzaqlaşdıraraq qəhrəmana çevrilən britaniyalı işdən qovulub.

AZXEBER.COM-un RİA Novosti-yə istinadən verdiyi xəbərə görə, o, bu “uğurunu” xəstəlik məzuniyyətində olan zaman qazandığı üçün belə bir aqibətlə üzləşib.62 yaşlı uelsli Pol Marşalsi yanvarın 21-də Avstraliyanın Kvinslend ştatının cənub-şərqindəki Kalundra turist şəhərciyinin çimərliyində istirahət edirmiş. Marşalsinin sözlərinə görə, balaca uşaqların çimdiyi əraziyə iki metrlik köpək balığının yaxınlaşdığını görən kimi o, dəniz yırtıcısının quyruğundan tutub və akulanı sahilin əks istiqamətinə aparıb.Marşalsinin bu hərəkəti hadisə yeri yaxınlığında çəkiliş aparan yerli telekanallardan birinin çəkiliş qrupu tərəfindən qeydə alınıb. Lakin bundan onun Uelsin Mertir-Tidvil şəhərində olan müdiri də xəbər tutub. Marşalsinin xəstəlik məzuniyyətində olduğu zaman göstərdiyi bu şücaəti onların xoşuna gəlməyib və onu işdən azad ediblər.