Artıq 2022-ci ilin son ayındayıq. Siçan ili artıq sayılı günlərdən sonra öz yerini növbəti illə əvəzləyəcək. Bu il ölkəmizin ictimai-siyasi həyatında maraqlı hadisələrlə yadda qaldı. Bəs, bu il ölümü ilə gündəm yaradan şəxslər kimlər oldu?
AZXEBER.COM 2022-ci ildə dünyasını dəyişən azərbaycanlı məşhurların siyahısını toplayıb. Həmin siyahını sizlərə təqdim edirik:
Azərbaycanın keçmiş prezidenti Ayaz Mütəllibov 2022-ci ildə dünyasını dəyişənlər arasında oldu. O, mart ayının 27-də 84 yaşında vəfat etdi.
Ölümündən əvvəl son vaxtların sosial şəbəkələrdə fenomenə çevrilən, xeyli izləyici kütləsinə sahib olan "Tosu Zəngilanlı" kimi tanınan "TikToker" də 2022-ci ildə dünyasnı dəyişdi. O, may ayının 31-də ürək tutması səbəbilə vəfat etdi. Onun ölümü sosial şəbəkələrdə müzakirələrə səbəb olmuşdu.
Dünyasını dəyişənlər arasında tanınmış müğənni, bəstəkar Rəhim Rəhimlinin də adı var. O, 30 sentyabr 2022-ci il tarixində ağır xəstəlikdən vəfat etdi. Bir çox tanınmış ifaların bəstəkarı kimi tanınan R.Rəhimli 2018-ci ilin iyunundan 2020-ci ilin yanvar ayına kimi "MTV Azərbaycan” telekanalının direktoru işləyib. O, eyni zamanda bəstəkarlıq fəaliyyəti ilə məşğul olub.
Oktyabrın 6-da Azərbaycan Sosial Demokrat Partiyasının sədri, sabiq deputat Araz Əlizadənin də ölüm xəbəri yayıldı. Onkoloji xəstəlikdən əziyyət çəkən partiya sədri Rusiyanın Azərbaycanda ən böyük dəstəkçilərindən biri hesab edilirdi. Qalmaqallı çıxışları ilə hər zaman gündəm olan Araz Əlizadə Yasamal rayon qəbirstanlığında dəfn edilib.
Tanınmış bəstəkar, Azərbaycan Respublikasının əməkdar incəsənət xadimi Ruhəngiz Qasımova oktyabrın 9-da 82 yaşında vəfat etdi. Ruhəngiz Qasımova Bəstəkarlar İttifaqının üzvü, Prezident təqaüdçüsü idi. Uzun müddət Azərbaycan Dövlət Televiziyasında və radiosunda səs rejissoru, bəstəkar kimi çalışıb.
18 oktyabr 2022-ci il tanınmış şair-publisist, YAP və AYB üzvü Yafəs Türksəs dünyasını dəyişdi. Şair uzun müddətdən bəri əziyyət çəkdiyi ağır xəstəlikdən sonra vəfat etdi. O, sosial şəbəkələrdə paylaşdığı müxtəlif şəkilləri ilə yaddaşlarda qalıb.
Əməkdar artist, məşhur xanəndə Süleyman Abdullayev (Dədə Süleyman) oktyabrın 23-ü vəfat etdi. Süleyman Abdullayev uzun müddətdir, şəkər xəstəliyindən əziyyət çəkirdi.
Noyabrın 3-də sabiq vergilər naziri Fazil Məmmədov da uzun sürən ağır xəstəlikdən sonra vəfat etdi. Keçmiş nazir Türkiyədə müalicə olunduğu xəstəxanada dünyasını dəşişmişdi.
Aydın Nuri
