Bakı Dövlət Universitetinin (BDU) Mexanika-riyaziyyat fakültəsinin Funksiyalar nəzəriyyəsi və funksional analiz kafedrasının məsləhətçi professoru, fizika-riyaziyyat elmləri doktoru Camali Məmmədxanov 86 yaşında vəfat edib.
Bu barədə Bakı Dövlət Universitetindən məlumat verilib.
Xatırladaq ki, Camali Məmmədxanov 1938-ci ildə anadan olub. 1946-cı ildə Bakının Mərdəkan qəsəbəsində orta məktəbə gedib, 1956-cı ildə Bakı şəhər 46 saylı orta məktəbi bitirib. 1956-1961-ci illərdə Bakı Dövlət Universitetinin Fizika-riyaziyyat fakültəsində təhsil alıb. Azərbaycan Milli Elmlər Akademiyasının Riyaziyyat və Mexanika İnstitutunda baş laborant, 1976-cı ilə qədər baş elmi işçi vəzifələrində işləyib.
O, 1964-cü ildə elmlər namizədi, 1984-cü ildə isə elmlər doktoru adını alıb. 1976-cı ildən BDU-nun Funksiyalar nəzəriyyəsi və funksional analiz kafedrasında dosent, 1985-cı ildən isə professor vəzifəsində çalışıb. 2014-cü ildən BDU-nun məsləhətçi professoru olan Camali Məmmədxanov 100-ə yaxın elmi məqalənin müəllifi idi. Onun rəhbərliyi ilə 13 elmlər namizədi, 3 elmlər doktoru yetişib.
Qeyd edək ki, Camali Məmmədxanov Şən və Hazırcavablar Klubunun prezidenti, "Bakılı oğlanlar" komandasının kapitanı, Milli Məclisin I, II və III çağırış deputatı olmuş Anar Məmmədxanovun atasıdır.
