AZXEBER.COM Xəzər TV-yə istinadən xəbər verir ki, həvəskar balıqçıların sözlərinə görə, indi normal ölçülü bir balıq tutmaq üçün günlərlə Araz çayının kənarında gözləmək lazım gəlir. Bəzi balıq növlərinin isə artıq Araz çayında mövcudluğu demək olar ki, əfsanəyə çevrilib.
Araz çayında balıqların kütləvi azalması bir neçə səbəblə əlaqələndirilir. Əsas səbəblərdən biri iqlim dəyişikliyi nəticəsində çaylarda suyun səviyyəsinin kəskin azalmasıdır.
Araz çayı balıqların kürüləməsi üçün ən əlverişli məkanlardan biri hesab olunur. Lakin son vaxtlar çayda suyun səviyyəsinin azalması balıqların bu əraziyə miqrasiyasına ciddi təsir göstərir.
Digər səbəblər sırasında insan amili də mühüm rol oynayır. Brakonyerlərin qanunsuz fəaliyyəti balıq ehtiyatlarının azalmasına gətirib çıxarır.
Balıqçılar bildirirlər ki, balıq ehtiyatlarının qorunması üçün mühafizə tədbirləri mütləq gücləndirilməlidir.
Görünən odur ki, ciddi tədbirlər görülməsə, yaxın bir neçə ildə Araz çayında balıq tutmaq daha da çətinləşəcək.
