"Əlbəttə ki, Azərbaycan dilindən fərqli digər bölmələrdə tədris aparılan dərslərin, xüsusən də "Azərbaycan tarixi"nin Azərbaycanca keçilməsinə ehtiyac var".
Bu sözləri AZXEBER.COM-a açıqlamasında təhsil eksperti Elçin Əfəndi növbəti tədris mövsümündən rus bölmələrində "Azərbaycan tarixi" fənninin Azərbaycanca keçilməsinə münasibət bildirirkən deyib.
O bildirib ki, bu qərarın verilməsi şagirdlərə gələcəkdə verəcəkləri imtahanlarda kömək olacaq:
"Bizim "Azərbaycan tarixi" fənni öz dilimizdə tədris olunmalıdır. Şagirdlərin bu fənni daha yaxşı mənimsəmələri, tarixdə baş verən hadisələri analiz etmələri üçün mütləq öz dillərində dərs almaları vacibdir. Bu, eyni zamanda onların gələcəkdə verəcəkləri imtahanlara da öz təsiri göstərir. Onların təhsil göstəricilərinə də təsir göstərmiş olur. Bilirsiniz ki, həmin o şəxslər 9 və ya 11-ci sinfi bitirdikləri zaman ayrıca dövlət dilindən imtahan verirlər. Təbii ki, dərslərin Azərbaycan dilində olması onların gələcək inkişaflarına da mühüm təsir göstərir. O baxımdan, alınan bu qərarı alqışlayır və müsbət qiymətləndirməliyik".
Qeyd edək ki, elm və təhsil naziri Emin Əmrullayevin əmrinə əsasən, məktəblərdə növbəti tədris mövsümündən rus bölmələrində "Azərbaycan tarixi" fənni Azərbaycan dilində keçiləcək.
Mikayıl Mirzəzadə
