AZXEBER.COM Xəzər TV-yə istinadən xəbər verir ki, hazırda paytaxt üzrə bu rəqəm 25 min manatdır. Halbuki şəhərdə evlərin 100 min manatdan başlayan qiymətlərlə, hətta 200-300 min manat və daha baha satılması adi hala çevrilib. Bu fərq, xüsusilə, son aylarda baş verən leysan, subasma və digər hadisələrdən sonra daha çox diqqət çəkir. Çünki bahalı evə ciddi zərər dəyəndə vətəndaşın aldığı icbari sığorta ödənişi çox vaxt ziyanın yalnız kiçik hissəsini qarşılaya bilir.
Mövcud qaydalara əsasən, Bakı şəhərində icbari əmlak sığortası üzrə haqq 50 manat, təminat isə 25 min manatdır. Gəncə, Sumqayıt və Naxçıvanda təminat 20 min, digər şəhər və rayonlarda isə 15 min manat müəyyən edilib.
Mütəxəssis Vüsal Bədəlov deyir ki, vətəndaş evinin tam dəyərinə yaxın təminat almaq istəyirsə, könüllü sığortaya üstünlük verməlidir.
Onun sözlərinə görə, vətəndaş təxminən 200 min manatlıq əmlakı üçün 200-300 manat civarında ödəniş etməklə evini könüllü sığortalada bilər.
