Xəbər verdiyimiz kimi, Prezident İlham Əliyev prezident Donald Trampın dəvəti ilə ABŞ-yə rəsmi səfərə gedib.
Milli Məclisin deputatı Hikmət Babaoğlu AZXEBER.COM-a açıqlamasında bu görüşün tarixi əhəmiyyəti haqda danışıb:
"ABŞ-də keçiriləcək görüş bütün əlamətlərinə görə tarixi bir görüşə çevriləcəkdir. Görünür, burada bir neçə məsələ kompleks şəklində öz həllini tapacaq. Vaxtilə həllini tapmayan kommunikasiyaların açılması məsələsinin artıq razılaşdırılması mümkün görünür. Bununla yanaşı bu görüşdə vaxtilə həllini tapmayan sülh məsələsinin mümkün həlli gözləndirilir".
Hikmət Babaoğlu həmçinin bu görüşün ikitərəfli münasibətlərdə soyuqluq probleminin də aradan qaldırılmasının gözlənildiyini deyib:
"Görüş zamanı Bayden Administrasiyası dönəmindən qalan ABŞ-Azərbaycan ikitərəfli münasibətlərində soyuqluq probleminin aradan qaldırılması gözlənilir ki, bunların hər biri həm Azərbaycan, həm də bütün regionumuz üçün həlledicidir. Ona görə də mənə elə gəlir ki, üçüncü aspektdə buna əlavə etmək lazımdır ki, bu da xüsusi əhəmiyyət kəsb edir. Bu ondan ibarətdir ki, son 200 ildə Cənubi Qafqazda imperativ təsir rıçakları olan regional aktorlar artıq bu mexanizmdən mərhum ediləcəklər. Beləliklə, regionda güc balansı tamamilə yeni bir mərhələyə qədəm qoyacaq. Bütün bunlar gözümüzün qabağında baş verən tarixi hadisələr olacaqdır və ümid edirəm ki, bu baş tutacaqdır. Təxminimiz doğru çıxsa, burada ən çox qazanan heç şübhəsiz ki, Azərbaycan və Azərbaycanın müttəfiqləri olacaq".
Günel Hüseynli
