"Sirr deyil ki, ABŞ ilə Azərbaycan arasında münasibətlər bir qayda olaraq respublikaçıların iqtidarları dövründə nisbətən yüksələn dövrünə qədəm qoyur. Demokratların hakimiyyəti dövründə isə nəinki Azərbaycan, bütövlükdə Türk və İslam dünyasına münasibətdə nifrət dili və açıq düşmənçilik ritorikası daha çox nəzərə çarpır. Xüsusən Azərbaycan bu yanaşmanı Vətən müharibəsi və antiterror tədbirlərindəki böyük zəfərlərinin ardınca, beynəlxalq hüququn aliliyini təmin etdikdən sonra birbaşa hiss etdi. ABŞ-nin qanunverici hakimiyyətinin hər iki palatası, o cümlədən ABŞ Dövlət Departamentinin ayrı-ayrı vəzifəli şəxsləri Azərbaycanın öz suveren haqlarını bərqərar etməsinə fərqli don geyindirməyə, Azərbaycana münasibətdə total informasiya hücumları təşkil etməyə başlamışlar. Çox təəssüflər olsun ki, bu proses hazırda da səngiməyib".

 

Millət vəkili hesab edir ki, ABŞ Ermənistanı yenidən müharibəyə sövq etməklə Cənubi Qafqazda sülh və sabitliyə əngəl yaratmış olur:

 

"ABŞ indiki məqamda Ermənistanı yenidən müharibəyə təşviq etməklə regionda sülh və sabitlik qarşısında əngəl kimi çıxış etməyə başlamışdır. Bəllidir ki, ABŞ onsuzda Ermənistanda böyük miqyaslı kəşfiyyat infrastrukturuna sahibdir. Kiçik bir ölkədə 3 minə yaxın səfirlik əməkdaşının çalışması, təbii ki, bu barədə danışmaq üçün kifayət qədər ciddi əsaslar ortaya qoyur. ABŞ-nin Ermənistanla hərbi təlimləri və Ermənistan Müdafiə Nazirliyinə ABŞ-dən mütəxəssislərin cəlb edilməsi isə göstərir ki, Vaşinqton daha da irəliləməkdə və regionda münaqişənin yenidən alovlandırılmasında açıq maraqlı tərəf kimi çıxış etməkdədir.

 

Düzdür, ABŞ Ermənistanla hərbi təlimlərini tamamilə başqa ssenaridə təqdim etməyə cəhd göstərir, lakin, heç şübhəsiz ki, dağlıq ərazilərdə hücum və diversiya əməliyyatlarına hazırlıq məqsədi güdən, Ermənistan ordusunu Azərbaycanla həmsərhəd regionlarda əməliyyatlara təşviq edən bu proses birmənalı şəkildə Azərbaycanın hərbi-siyasi qələbələri ilə yaranmış konfiqurasiyanın dağıdılmasına yönəlib. Görünən odur ki, ABŞ Ermənistana özünün yeni hərbi koloniyası və forpostu kimi baxır. Təbii ki, Azərbaycan da bu prosesləri çox diqqətlə izləyir, təəssüf ki, ABŞ-nin regiona müsbət heç nə vəd etməyən bu davranışları digər, bu prosesdən daha çox zərər çəkəcək region ölkələrində hələ ki lazımi reaksiyalara səbəb olmayıb. Baxmayaraq ki ABŞ-nin Yaxın Şərqdə, o cümlədən Suriya, İraq, Ukrayna, hətta Gürcüstanın özündə bundan öncə ciddi faciələrə səbəb olan addımlarını təhlil etməli və regionda yeni təhlükə mənbəyinin formalaşmaması üçün səylərini birləşdirməlidir".