Aİ Rusiyaya qarşı 21-ci sanksiyalar paketini təsdiqlədi
DÜNYA
02:27 24.07.2026
905
AZXEBER COM bu barədə Aİ Şurasının rəsmi saytına istinadən xəbər verir.
Əsas yenilik kriptovalyutalara екsterritorial yanaşmadır, yəni ərazisində Avropa sanksiyalarından yayınmağa şərait yaradan platformaların fəaliyyət göstərdiyi dövlətlərə qarşı Aİ konkret bir kriptobirjanı bloklamaq əvəzinə, tam ölkə qadağası (full third-country ban) tətbiq edə biləcək.
Daha iki yenilik isə "kölgə donanması" üçün bunkerləmə və işəgötürmə ilə məşğul olan şirkətlərə qarşı sanksiyaların tətbiq edilməsi imkanı, həmçinin Rusiya neftini emal edən üçüncü ölkələrdəki neftayırma zavodlarının sanksiya siyahılarına daxil edilməsidir.
Aİ Şurasının Rusiyaya qarşı 21-ci sanksiyalar paketinə aşağıdakılar daxil edilib:
- Son dörd ilin rekord göstəricisi olaraq 218 fiziki və hüquqi şəxsə (48 vətəndaş və 170 təşkilat) qarşı məhdudiyyətlər tətbiq edilib;
- 94 bank və iri maliyyə institutu üçün aktivlərin dondurulması və vəsaitlərin təmin edilməsinə qadağa qoyulub;
- Rusiyanın 33 kredit təşkilatına, həmçinin sanksiyalardan yayınmağa kömək edən Qırğızıstan və digər ölkələrin banklarına qarşı əməliyyat qadağası genişləndirilib;
- Sanksiya siyahısına hərbi-sənaye kompleksinin 50-dən çox müəssisəsi, o cümlədən uzaqmənzilli dronların əsas istehsalçıları əlavə edilib;
- Rusiyaya sanksiyalardan yayınmağa kömək edən üçüncü ölkələrin kriptovalyuta platformaları ilə əməliyyatlara tam qadağa qoyulması imkanı tətbiq edilib (siyahıya Gürcüstan, Panama, BƏƏ, Marşall adaları, Qırğızıstan və Belarusda yerləşən 14 platforma əlavə olunub);
- Neftin qiymət həddinin avtomatik tənzimlənməsi mexanizmi 2027-ci ilin iyuluna qədər dayandırılıb, Rusiya neftinin qiymət həddi bir barel üçün 44 dollar səviyyəsində qalacaq;
- Siyahıya 41 yeni tanker əlavə edilib (ümumilikdə 673), həmçinin ilk dəfə olaraq bu gəmilər üçün bunkerləmə və heyətin işə götürülməsi ilə məşğul olan şirkətlər sanksiya siyahısına salınıb.
OXŞAR XƏBƏRLƏR
ƏN SON XƏBƏRLƏR
