"Yüksəliş Partiyasının sədri Anar Əsədlinin həbsinin siyasi motivlərə bağlanması absurd bir fikirdir. Məsələni araşdırmadan, məlumat almadan bəzi müxalifətçilər elə düşünür ki, müxalifətçi istədiyi hər şeyi edə bilər. Hələ də bəzi qisim müxalifətçilər hamının qanun qarşısında bərabər olduğunu və qanun qarşısında cavab verməli olduğunu dərk etmək istəmir. Yaxud dərk etsə də bundan öz siyasi çıxarları üçün istifadə etməyə çalışır”.
Bunu AZXEBER.COM-a açıqlamasında deputat Vüqar İskəndərov deyib.
"Partiya mənsubiyyətindən, siyasi baxışından asılı olmayaraq, bir şəxslə bağlı şikayət varsa, əlbəttə ki bu məsələ araşdırılmalıdır. Kimsə dələduzluq edirsə hüquqi müstəvidə qarşılığını almalıdır. Bu baxımdan hər hansı siyasi partiya sədri də hər şeydən öncə vətəndaş olaraq davranışlarına görə qanun qarşısında məsuliyyət daşıyır. Anar Əsədli barəsində öz tanışı olan şəxslər şikayətçi olub. Burada dələduzluq faktı var. Maraqlıdır ki, bu məsələyə siyasi don geyindirənlər nə düşünür? Anar Əsədli müxalif partiyanın sədridir deyə qarşı tərəfin hüquqları tapdalanmalıydı? Əlbəttə ki yox. Biz hüquqi dövlətdə yaşayırıq. Azərbaycan Respublikasının qanunları hər şeydən üstündür. Hamı da bu qanun qarşısında məsuliyyət daşıyır. Bəzi siyasətçilər var ki, siyasi baxışından özünü müdafiə sistemi kimi istifadə etməyə çalışır. Belə siyasətçilər hesab edir ki, qanundan kənar hərəkət etsələr də sonda əməllərinə siyasi don geyindirməklə şantaj üsuluna keçə bilərlər. Ancaq bu tamamilə məntiqsizdir. Məsələyə bu cür yanaşanlar, elə Anar Əsədlinin özü və yaxınları siyasi fəaliyyəti məsuliyyətdən yayınma vasitəsinə çevirmək istəyir. Ancaq 90-cı illərdən qalma müxalifətçilər hələ də anlamır ki, Azərbaycan cəmiyyəti kifayət qədər savadlı cəmiyyətdir və belə siyasi oyunların vasitəsinə çevrilməz. Bu baxımdan Anar Əsədli də qanunun hökmü ilə razılaşmalı və hələ üstəlik partiya sədri olduğu üçün, partiya üzvləri qarşısında müəyyən imici və məsuliyyəti olduğu üçün dürüst davtanmalıdır”.
