M.Məmmədovun sözlərinə görə, ANS teleşirkətində aparılan daxili islahatlar çərçivəsində kadrların yerdəyişməsi olub. Belə ki, tanınmış telejurnalist Sevinc Mirzəyeva Xarici əlaqələr departamentinin rəhbəri təyin edilib. Vitse-prezident Mirşahin Ağayev isə həm də yenidən köhnə peşəsinə-“Xəbərçi”liyə qayıdıb. O, “Xəbərlər” redaksiyasının baş redaktoru təyin edilib.
“Mirşahin ANS-də xəbərlərin atası sayılır. Onun bu məsələdə xüsusi yeri var”-deyə M.Məmmədov bu təyinatı şərh edərkən bildirib. Onun sözlərinə görə, bu təyinatın məqsədi “Xəbərçi”ni daha da irəli aparmaqdır.
Bundan başqa “Xəbərçi”nin səhər, günorta, axşam və əsas buraxılışı üzrə layihə rəhbərləri təyin edilib. Onlar həmin saatlarda efirə gedəcək xəbər buraxılışında redaktor-prodüser vəzifəsində çalışacaqlar. Məsələn, telejurnalist Azadə Balayeva “Xəbərçi”nin saat 21.00 buraxılışına layihə rəhbəri təyin edilib. “İç xəbər” sosial proqramına isə Zənurə Talıbova rəhbərlik eədəcək. “Xəbərçi”də aparıcı kimi gördüyümüz Qənirə Ataşova həftəlik efirə çıxan “Hesabat” verilişində layihə rəhbəri təyin edilib. Onunla bərabər burda analıq məzuniyyətindən qayıtmış Afət Telmanqızı da çalışacaq.
Məlumata görə, ANS-də aparılan islahatlar çərçivəsində Xarici əlaqələr departamentinin rəhbəri Etibar İbrahimov olmaqla 5 nəfər işdən azad edilib. İndiyədək "Xəbərçi"nin daxilində ayrıca veriliş kimi efirə çıxan "İqtisadiyyat xəbərləri" də bağlanıb.
Digər məlumata görə, telejurnalistlərin maaşları onların çalışdıqları verilişlərin reytinqinə uyğun veriləcək.
"Bəs Xarici əlaqələr departamentinin rəhbəri Etibar İbrahimov hara gedib" sualına Mais Məmmədov "bilmirəm" deyə cavab verib. O, bildirib ki, son zamanlar efirdə müşahidə edilən yeniliklər teleşirkətin inkişafı ilə bağlı aparılan islahatların təzahürlərindəndir . //Modern.az
