Xəbər verdiyimiz kimi, İspaniya futbol üzrə dünya çempionatının finalında Argentinaya qalib gələrək qızıl medallara sahib çıxıb.
Finalda Argentinanın 1:0 hesab ilə məğlub olması futbol ictimaiyyətində geniş müzakirələrə səbəb olub. Gərgin mübarizə şəraitində keçən qarşılaşma həm taktiki baxımdan, həm də fərdi performanslar baxımından diqqət çəkib.
AZXEBER.COM-a danışan idman jurnalisti Anar Xanlarov bildirib ki, İspaniya oyuna tam nəzarət edərək qələbəyə layiq futbol nümayiş etdirib:
"İspaniya 90 dəqiqə dominant futbol oynadı. Açığı, mən Argentinadan bu cür zəif oyun gözləmirdim. Onlar demək olar ki, heç nə edə bilmədilər.
Baxmayaraq ki, yaxşı futbolçuları var, bundan əvvəlki oyunlarda dəfələrlə geridönüş etməyi bacarmışdılar, amma bu dəfə olmadı. İspaniya daha sistemli oynadı, rəqibi topsuz qoyaraq kifayət qədər yordu. Topsuz qalan argentinalılarda təbii olaraq aqressiya yaranmağa başladı ki, bunun da nəticəsində azlıqda qaldılar".
Anar Xanlarov qeyd edib ki, Argentinanın azlıqda qalması və Messinin yaşı komandanın məğlubiyyətində əsas amillərdən biri olub:
"Onsuz da çətinlik çəkirdilər, 10 nəfərlə isə ümumiyyətlə, duruş gətirə bilmədilər. 90 dəqiqəni birtəhər başa vursalar da, əlavə vaxtda dözmədilər. O ki qaldı Messiyə, təbii ki, yaş öz sözünü deyir. Bəlkə də Messinin 20-22 yaşı olsaydı, oyunu təkbaşına udardı. Amma 39 yaş... Reallıq var. Messi bütün gücünü ortaya qoydu, hətta son saniyələrdə təhlükəli keçid və ötürmə də etdi. Amma daha artığını etmək üçün yaş imkan vermədi. İstənilən halda, 39 yaşında dünya çempionatının finalında oynamaq sıradan iş deyil. Messi bir əfsanədir, dünya futbolu onun boşluğunu uzun illər hiss edəcək".
Qeyd edək ki, FIFA 2026-cı il Dünya Çempionatı üçün ümumilikdə 727 milyon dollar vəsait ayırıb. Bunun 655 milyon dolları mükafat fondu, qalan hissəsi isə turnirdən əvvəl iştirakçı komandaların hazırlıq xərclərinin qarşılanması üçün nəzərdə tutulub. Çempion İspaniya 50 milyon, finalçı Argentina isə 33 milyon dollar mükafat qazanıb. Turnirdə iştirak edən bütün komandalar isə nəticəsindən asılı olmayaraq əlavə 1,5 milyon dollar hazırlıq xərci alıb.
Fəridə Əsədzadə
