"Lənkəranda ənənəvi arıçılıqdan fərqli olaraq müasir və innovativ üsullardan istifadə edilir".
AZXEBER.COM xəbər verir ki, bu sözləri sahibkar, "Balçı Səyavuş” arıçılıq təsərrüfatının rəhbəri Səyavuş Yaqubov Dövlət Turizm Agentliyinin Lənkərana təşkil etdiyi mediatur zamanı jurnalistlərə açıqlamasında deyib.
S.Yaqubov bildirib ki, təsərrüfatda arıçılıqla yanaşı, bu sahə ilə bağlı maraqlı yeniliklər də tətbiq olunur. Onun sözlərinə görə, KOBİA-nın arıçılıqla bağlı ikinci qrant müsabiqəsində qalib gəliblər. Ötən il isə "Şəhərdən-kəndə” layihəsi çərçivəsində arıçılıq muzeyi təqdim edilib.
Muzeydə arı məhsullarının müxtəlif istehsal növləri nümayiş etdirilir. Təsərrüfatın əsas fərqləndirici xüsusiyyətlərindən biri burada apiterapiya evinin fəaliyyət göstərməsidir.
Bundan başqa, ziyarətçilərin arı havasında istirahət edə və yata biləcəyi xüsusi otaqlar və pətəklər də yaradılıb. Sahibkarın sözlərinə görə, bu üsullardan insanların rahatlaması, zehni fəaliyyətinin dəstəklənməsi və immun sisteminin gücləndirilməsi məqsədilə istifadə olunur.
Təsərrüfatda texnologiyadan da geniş istifadə edilir. S.Yaqubovun sözlərinə görə, özlərinin hazırladığı smart tərəzilər arı pətəklərinin altına yerləşdirilir. Sistem vasitəsilə pətəyin çəkisi, temperaturu və rütubəti barədə məlumatlar məsafədən izlənilir və SMS vasitəsilə əldə edilir.
Beləliklə, Lənkərandakı təsərrüfatda ənənəvi arıçılıq müasir texnologiya və turizm imkanları ilə birləşdirilir.
