Xəbər verdiyimiz kimi, son zamanlar ölkəmizə "arıqlama çayı və qəhvələri” adı altında gətirilən çayların tərkibində güclü təsirə malik maddə hesab edilən "sibutramin” maddəsi aşkar edilib. 

AZXEBER.COM xəbər verir ki, bu maddə bir çox ölkələrdə, o cümlədən ABŞ və Avropa İttifaqında, 2010-cu ildən sonra müxtəlif ciddi problemlərə yol açma potensialı olmağı səbəbindən qadağan edilib. 

Bəzi hallarda ölümə səbəb ola bilən sibutramin, bir zamanlar arıqlamaq üçün istifadə olunan dərman hesab olunub. O, iştahı azaldır və mədənin doyma hissini artırır. 

Sibutramin, serotonin, norepinefrin və dopamin kimi beynin kimyəvi maddələrinə təsir edərək işləyir.  Bu isə insanın yeməyə olan marağını azaltmağa kömək edir. 

Təəssüf ki, maddənin təsiri sadəcə bunlarla yekunlaşmır. Sibutramin Yüksək qan təzyiqinə (hipertoniya) səbəb olur. Xüsusən yüksək təzyiqi olan insanlarda bu vəziyyət ciddi təhlükələrə yol aça bilər. 

Sibutramin ürək sürətini artıra bilər və bu, ürək xəstəlikləri olan şəxslərdə (məsələn, ürək çatışmazlığı, infarkt riski) ölümcül nəticələrə səbəb ola bilər. Həmçinin, ürək ritmi pozulmaları (aritmiyalar) yarada bilər ki, bu da həyati təhlükə yarada bilər. 

Maddə həmçinin insulta da səbəb ola bilir. Bununla yanaşı Sibutramin, beyindəki kimyəvi maddələri dəyişdirdiyi üçün, bəzi hallarda anksiyete, depressiya, qeyri-sabit emosional vəziyyət və hətta intihar düşüncələrinə səbəb ola bilər. 

Sibutramin aşırı dozada alındıqda ciddi zəhərlənməyə, ürək dayanmasına və digər həyati təhlükəli vəziyyətlərə yol aça bilər.

 

Oksana