Çəki atmaq istəyənlərin əksəriyyəti sürətli nəticə verən üsullar axtarır. Son illər isə xüsusilə sosial şəbəkələrdə səhər acqarına içilən təbii qarışıqların arıqlama prosesini sürətləndirdiyi ilə bağlı iddialar geniş yayılıb.
Ən populyar reseptlərdən biri də ilıq suya limon şirəsi, zəncəfil və istəyə görə təzə nanə yarpaqları əlavə olunaraq hazırlanan içkidir. Bu qarışığın maddələr mübadiləsini sürətləndirdiyi və həzm sistemini dəstəklədiyi deyilsə də, mütəxəssislər bununla bağlı vacib məqama diqqət çəkirlər.
Onların sözlərinə görə, limonlu və zəncəfilli ilıq su kimi aşağı kalorili içkilər günə sağlam başlamaq, orqanizmin su balansını bərpa etmək və şəkərli içkilərdən uzaq durmaq baxımından faydalı seçim sayılır. Bir stəkan ilıq suya yarım limonun şirəsi və az miqdarda rəndələnmiş zəncəfil əlavə edilməklə hazırlanan bu içki həzmi dəstəkləyə bilər. Lakin onun təkbaşına yağ yandırdığı və ya qısa müddətdə nəzərəçarpacaq çəki itkisi yaratdığı elmi baxımdan sübut olunmayıb.
Mütəxəssislər vurğulayırlar ki, sağlam və qalıcı arıqlamanın əsas şərti balanslı qidalanma, zülalla zəngin səhər yeməyi, müntəzəm fiziki aktivlik və keyfiyyətli yuxudur. Təbii içkilər isə yalnız bu həyat tərzini tamamlayan köməkçi vasitə hesab edilməlidir. Buna görə də sürətli nəticə vəd edən reseptlərə aldanmaq əvəzinə, sağlam vərdişlər formalaşdırmaq daha düzgün seçim sayılır.
/Metbuat.az
