Azərbaycan əsilli Rusiya biznesmeni Telman İsmayılova məxsus “AST” şirkətinin Moskvadakı ofislərinin birində axtarış aparılır. Bu barədə “İnterfaks” agentliyi Rusiya hüquq-mühafizə orqanlarındakı mənbələrinə istinadla xəbər verib. Axtarışa xüsusi təyinatlı polis dəstəsi dəstək verir.
Xatırladaq ki, bundan əvvəl Baltika gömrüyü ilə bağlı cinayət işi bərpa edilib. Həmin iş qaçaqmalçılığın kriminal cinayətlər sırasından çıxarılması ilə əlaqədar bağlanmışdı.Yüksək vəzifəli məmurların adının keçdiyi həmin cinayət işində yeni ittiham gömrük rüsumunu ödəməkdən yayınmaqdır. Bundan əvvəl T.İsmayılova məxsus böyük ticarət mərkəzi – “İzmaylov bazarı” bağlanmışdı.
T. İsmayılov isə “İnterfaks”a bildirib ki, hüquq-mühafizə orqanları ona və rəhbərlik etdiyi şirkətə heç bir irad bildirməyiblər: " Hüquq-mühafizə orqanları mənə və rəhbərlik etdiyim şirkətə heç bir irad bildirməyiblər, belə bir problem yoxdur. Mətbuatda yoxlama aparıldığı yazılan şirkətin isə mənim rəhbərlik etdiyim AST şirkətinə heç bir aidiyyatı yoxdur”.
lent.az
