İspaniyanın "Atletiko" klubunda futbolçu Yannik Karrasko ilə bağlı növbəti münaqişə baş verib.
AZXEBER.COM Report-a istinadən xəbər verir ki, buna belçikalı yarımmüdafiəçinin sol dizindəki zədəni evində müalicə etdirməsinə klub rəhbərliyinin icazə verməməsi səbəb olub. 24 yaşlı oyunçu zədə səbəbindən son 4 oyunda meydana çıxa bilməyib.
O, sonuncu dəfə oktyabrın 18-də Bakıda "Qarabağ"a qarşı keçirdikləri Çempionlar Liqasının III tur matçında forma geyinib. Həmin vaxt əvəzlənərkən, meydanı ləng tərk etməsinin baş məşqçi Dieqo Simeonenin narazılığına səbəb olduğu və futbolçunun iradlarla üzləşdiyi bildirilib. Bu dəfə isə Karraskodan zədəsini Belçikada deyil, elə klubun bazasında müalicə etdirməsi tələb olunub. Yarımmüdafiəçi bunu özünə qarşı qərəz hesab edib.
Qeyd edək ki, Yannik Karrasko yayda İngiltərənin "Çelsi" klubunun maraq dairəsində olub. Lakin "Atletiko"da yeni oyunçu transferinə qadağa qoyulduğu nəzərə alınaraq, belçikalı futbolçunun satılmasına icazə verilməyib. İspaniya komandası "Qarabağ"la Bakıda 0:0, Madriddə isə 1:1 hesablı heç-heçə edib.
