“İlk qaz İtaliyaya 2020-ci ildə çatacaq”.
“Şahdəniz” yatağı daxili bazar və qonşu ölkələrin tələbatını ödəməkdən də artıq qaz ehtiyatlarına malikdir.
AZXEBER.COM APA-ya istinadən xəbər verir ki, bunu energetika naziri Natiq Əliyev İtaliyanın AGI informasiya agentliyinə müsahibəsində deyib.
“Bu səbəbdən qazı Avropaya çatdırmaq qərarına gəldik. Azərbaycan üçün qazı satmaq çox vacibdir. Ən etibarlı bazar isə Avropa bazarıdır.
Avropa Komissiyası da öz tərəfindən mənbələri və təchizat marşrutlarını şaxələndirmək istəyir ki, bu məqsəd Azərbaycanın qaz satışı ilə bağlı planları ilə üst-üstə düşür.
Beləliklə, TAP sadəcə Azərbaycanın deyil, həm də Avropanın prioritetidir. Bu səbəbdən qaz yatağının ikinci fazasını inkişaf etdirmək istəyirik. Layihəyə yatırılacaq sərmayə də olduqca nəhəngdir - 45 milyard dollar.
Bu, sadəcə iqtisadi deyil, həm də texnoloji və sosial layihədir, çünki on minlərlə yeni iş yerinin açılmasına səbəb olacaq. “Şahdəniz” yatağının işlədilməsinin ikinci mərhələsində “Cənub Qaz Dəhlizi” ilə 16 milyard kubmetr qaz ixrac olunacaqdır ki, bunun 6 milyard kubmetri Türkiyə bazarında realizə olunacaqdır.
Lakin Azərbaycanda “Abşeron” qaz yatağı kimi “Şahdəniz”dən başqa böyük imkanları olan digər qaz yataqları da var. “Abşeron” yatağının ehtiyatı 400 milyard kubmetr qiymətləndirilir.
Avropaya qaz nəqlinin birinci mərhələsinin müvəffəqiyyətlə başa çatması Azərbaycanın digər qaz yataqlarının da layihəyə cəlb olunaraq qaz həcminin artırılmasına şərait yaradacaq”, - deyə nazir qeyd edib.
İşlərin görülməsi qrafikinə riayət edildiyini vurğulayan N.Əliyev qeyd edib ki, inşaat işləri 2019-cu ildə bitəcək:
“İlk qaz İtaliyaya 2020-ci ildə çatacaq.
“Şahdəniz” yatağının istismarının II mərhələsinin icrası nəzərdə tutulmuş cədvəldən daha tez icra olunur. Dəniz dibindəki quyular artıq hazırdır, platforma və boru kəmərləri tikilməkdədir. Nəzərdə tutulmuş cədvəldə dəyişiklik və gecikmələrin olması üçün səbəb yoxdur.
2019-cu ildə qaz Türkiyəyə, növbəti ildə isə Avropa və İtaliyaya nəql ediləcək. Layihənin vaxtında icrası digər aidiyyəti ölkələrdə - Yunanıstan, Albaniya və İtaliyada işlərin icrasının sürətindən də asılıdır. İnşaat işləri üçün çoxsaylı icazə və lisenziyaların əldə edilməsinə ehtiyac var. Həmin icazələrin alınması da işin surətinə təsir edəcək”.
