"Biz - Azərbaycan xalqı 8 Martı, demək olar ki, Sovet qurulandan bəri qeyd edirik. 8 Mart, adətən Azərbaycanda xanımların günü kimi qeyd olunur və bütün insanlar xanımlara əlavə xüsusi diqqət, qayğı göstərir. Heç zaman Azərbaycanda qadın haqlarının pozulması, qadınların əzilməsi kimi məsələlər 8 Martda gündəmə gəlməyib. İndi 3-5 Avropanın "ceyran”ı, 3-5 nəfər Avropadan qrant alan burada 8 Martda guya qadın hüquqları-filan qoruyur”.
Bu sözləri AZXEBER.COM-a açıqlamasında Ağ Partiya sədri Tural Abbaslı 8 Mart günü Bakıda keçirilən icazəsiz aksiyaya münasibət bildirərkən deyib.
O qeyd edib ki, bu aksiyalarda onların özlərindən başqa heç kim olmur:
"Feministlik, Azərbaycanın milli-mənəvi dəyərlərinə uyğun gəlməyən şüuarlar - görürsünüz cəmiyyət də belə şeyləri yad qarşılayır. Hər il də özlərindən başqa heç kim olmur, hər il azala-azala gedirlər. İnşallah, kökləri də kəsiləcək”.
Tural Abbaslı bildirib ki, Azərbaycanda heç zaman gender problemi olmayıb:
"Azərbaycan xalqı, Azərbaycan kişisi, övladı, qardaşı öz anasının da, öz bacısının da, yoldaşının da qədrini bilir. Onların qeydinə qalır. Azərbaycanda heç zaman gender problemi olmayıb, qadın-kişi ayrıseçkiliyi-filan olmayıb. Yalnız qadınlara qarşı müsbət mənada ayrıseçkilik olub. Bu gün kimlərinsə xoşuna gəlmək üçün, fərqli görsənmək üçün və ya haradansa 3-5 manat qrant qazanmaq üçün belə oyunlardan çıxmağa ehtiyac yoxdur”.
"Maraqlısı budur ki, bu aksiyanı təşkil edənlərin böyük əksəriyyəti cəmiyyətdə həyat tərzlərinə görə müsbət qarşılanmayan insanlardır. Boş-boş adamlardır. Bu, bizə yad prosesdir və inşallah, Azərbaycanda tutmaycaq”, - deyə Tural Abbaslı əlavə edib.
Aydın Nuri
