İyunun 10-12-də Bakıda keçiriləcək II Türk dövlətləri ticarət və investisiya əməkdaşlıq sərgisində türk dövlətlərinin brendləri təqdim ediləcək.
AZXEBER.COM xəbər verir ki, bunu sərginin təşkilatçısı olan ROK EXPO şirkətinin rəhbəri Aygün Əliyeva bildirib.
"Bu gün türk dövlətlərinin iş dünyası olaraq bir araya gələrək birlikdə daha güclü olacağımızı nümayiş etdirmək üçün buradayıq. Son 30 ildə Türk Dövlətləri Təşkilatı (TDT) ölkələrimiz arasında əməkdaşlığı gücləndirmək, dünya miqyasında birliyimizi möhkəmləndirmək üçün mühüm addımlar atıb. Təşkilatın, daha sonra isə Türk Ticarət və Sənaye Palataları Birliyinin yaradılması ilə bu əməkdaşlıq daha da dərinləşdi. Bu gün biz enerji, turizm, rəqəmsallaşma, kosmik tədqiqatlar və digər sahələrdə birgə fəaliyyət göstərmək imkanına sahibik. Türk dövlətləri arasında iqtisadi əməkdaşlıq, ümumi inteqrasiya və firavanlıq üçün vacib, dinamik istiqamətdir. Bu əməkdaşlıqdan özəl sektorun da faydalanması üçün biz "Türk Ticarət Sərgisi” layihəsini yaratdıq. Bu platforma TDT-yə üzv ölkələr arasında işgüzar əlaqələrin inkişafına xidmət edir”, - deyə o qeyd edib.
A.Əliyeva əlavə edib ki, sərgi Bakı Ekspo Mərkəzində keçiriləcək. Təşkilatçılar arasında onlardan başqa, İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA), İqtisadi İslahatların Təhlili və Kommunikasiya Mərkəzi, "KOB Subyektləri və Klubların Assosiasiyası" (KOPSKA) İctimai Birliyi də var".
Onun sözlərinə görə, sərgidə 20-dən çox sahədə məhsul qrupları və yeni texnologiyalar nümayiş etdiriləcək: "Ölkələrin investisiya imkanları, əsas sektorlar, iş adamlarının qarşılaşdıqları problemlər və onların həlli yollarını konfranslar zamanı ekspertlər müzakirə edəcək. B2B formatında görüşlərlə şirkətlər arasında strateji tərəfdaşlıqlar qurulacaq və ortaq türk brendləri formalaşacaq. Sərgiyə 11 ölkə iştirakçı, 20-dən çox ölkə isə ziyarətçi statusunda qatılacaq. Sevindirici haldır ki, yüzlərlə türk şirkəti eyni zamanda və eyni məkanda bir araya gələcək".
