Son altı ildə Azərbaycanda böyük dəyişikliklər həyata keçirilib.
Bunu İsrailin səfiri Corc Dik bildirib.
"Bu müddət Azərbaycan və İsrail, bütövlükdə ölkələrimiz arasındakı tərəfdaşlıq üçün tarixi dəyişikliklər illəri olub. Biz münasibətlərimizi strateji tərəfdaşlıq adlandırırıq, lakin son altı ildə onları yeni zirvəyə qaldırdıq. İlk növbədə, 2023-cü ilin martında - 30 illik diplomatik münasibətlərdən sonra - Azərbaycanın İsraildə səfirliyinin açılması tarixi yenidən yazan mühüm bir mərhələ oldu. Sonra 2023-cü ilin mayında Prezident Hersoqun səfəri baş tutdu, o bizi şərəfləndirərək Heydər Əliyev Mərkəzində İsrailin Müstəqillik Günü bayramında iştirak etdi", - deyə o bildirib.
Səfir azad edilmiş ərazilərə səfər edən ilk İsrail səfiri olmağın onun üçün şərəf olduğunu vurğulayıb.
"Mənim üçün Şuşaya səfər edən və onun əzəmətinə şahid olan, Füzulinin xarabalıqlarını, Kəlbəcərdə İstisu müalicəvi sularını, Ağdamın bərpasını, Zəngilanda gözəl mənzərəli Ağalı kəndini və Laçının nəfəs kəsən təpələrini görən ilk İsrail səfiri olmaq şərəf idi", - deyə o bildirib.
"Azərbaycanı bu tarixi nailiyyət münasibətilə təbrik edirəm. İsrail Azərbaycanın ərazi bütövlüyünə tam və sarsılmaz dəstək ifadə edən az sayda ölkələrdən biri idi - təkcə sözlə deyil, həm də əməldə. Çünki əsl dostluq asan zamanlarda deyil, çətin zamanlarda sınaqdan keçir", - deyə o vurğulayıb.
///report
