Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Cəzaçəkmiş Qadınlarının Cəmiyyətə Qayıdışı” İctimai Birliyi tərəfindən həyata keçirilən "Cəzaçəkmə müəssisələrində kütləvi mədəni tədbirlərin təşkili” qrant layihəsi çərçivəsində təlim proqramları uğurla davam etdirilir.
Layihənin əsas məqsədi həbsdən azad olunan qadınların yenidən cəmiyyətə uğurlu inteqrasiyasına nail olmaq, onların sosial-iqtisadi müstəqilliyini təmin etmək və həyatlarını yenidən qurmaq üçün zəruri bilik və bacarıqlar qazandırmaqdır. İctimai Birliyin təşkilatçılığı ilə keçirilən seminarlar sahibkar olmağı hədəfləyən qadınlara nəzəri və praktiki nümunələr əsasında biznes qurmaq və idarəetmə üzrə dərin bilgilər təqdim edir.
Artıq bir neçə gündür ki, qadınlara sahibkarlıq mövzusunda intensiv dərslər keçirilir. Layihənin növbəti təlim sessiyası "Biznesin davamlılığı” mövzusuna həsr olunub. Təlimçi Rəvan Cəfərli biznesin uzunömürlü olması üçün nəzərə alınmalı bütün mühüm nüanslardan bəhs edib, "Biznesin uzunömürlü olması üçün hansı addımlar atılmalıdır?” sualına ətraflı cavab verib. O, həmçinin xərclərin idarə olunması, büdcəyə nəzarət, risklərin azaldılması və investisiyaların uzunmüddətli gəlirliliyinin təmin edilməsi istiqamətində real nümunələr əsasında praktiki tövsiyələr təqdim edib.
Təlimlər yalnız sahibkarlıq bacarıqlarının formalaşdırılması ilə kifayətlənmir, eyni zamanda iştirakçıların liderlik potensialının inkişafına, özünəinamlarının möhkəmləndirilməsinə və qarşılıqlı sosial dəstək şəbəkəsinin qurulmasına mühüm töhfə verir.
"Cəzaçəkmiş Qadınlarının Cəmiyyətə Qayıdışı” İctimai Birliyi hesab edir ki, bu layihə cəmiyyətin həssas qruplarının iqtisadi və sosial baxımdan güclənməsi istiqamətində mühüm addım olmaqla yanaşı, qadınların azadlıqdan sonrakı həyatında yeni imkanlar yaradır.
