"Dünyada gedən iqlim dəyişikliklərinin fəsadları əlbəttə ki, ölkəmizdən də yan keçmir. Biz bunu çaylarımızda suyun azalması, istiləşmə, Xəzər dənizinin səviyyəsinin dəyişməsi və s. təbiət hadisələrində müşahidə edirik. Bu baxımdan dünyada baş verən proseslərə Azərbaycan da biganə qala bilməz. Ölkəmizdə yaşıl enerji imkanlarının yaradılması, genişləndirilməsi bizim üçün prioritet məsələdir”.
Bu sözləri AZXEBER.COM-a açıqlamasında Millət vəkili Vüqar İskəndərov deyib.
Deputat əlavə edib ki, COP29 bizim ümumi yaşıl enerji gündəliyimizin və məsuliyyət hissimizin bir hissəsini təşkil edir:
"İlk olaraq onu qeyd etmək lazımdır ki, qazıntı yanacağı ilə zəngin ölkələr yaşıl enerjiyə keçiddə ön sıralarda olmalıdır. Bu baxımdan COP29 bizim ümumi yaşıl enerji gündəliyimizin və məsuliyyət hissimizin bir hissəsini təşkil edir. Cənab prezident İlham Əliyevin də qeyd etdiyi kimi biz bunu ənənəvi ehtiyatlarımız çatışmadığına görə etmirik, sadəcə olaraq, neft-qaz satışından əldə etdiyimiz maliyyədən, gəlirlərdən bərpaolunan enerjiyə sərmayə yatırmaq üçün istifadə etməklə töhfə vermək və buna ehtiyacın olduğuna dair ümumi bir anlayış yaratmaq istəyirik.
Statistikalar da onu göstərir ki, Azərbaycanın bərpaolunan enerji layihələri gündəliyi çox iddialıdır. Beynəlxalq Maliyyə Korporasiyasının hesablamalarına əsasən, Xəzər dənizinin Azərbaycan sektorunda potensialı 157 giqavat təşkil edir. Azərbaycanın enerji gündəliyində yaşıl enerjinin rolunun getdikcə artırılması gələcəkdə bu istiqamətdə müsbət nəticələr vəd edir. Prezident İlham Əliyevin "Euronews” televiziyasına verdiyi müsahibəsində bildirdiyi kimi, bu istiqamətdə artıq mühüm yolu qət etməyə başlamışıq".
Millət vəkili hesab edir ki, Azərbaycan 10 il müddətinə enerjidən maksimum istifadə edərək qaz istehlakını azalda bilər:
"Planlamaya görə, təxminən 10 il müddətinə ölkədə bərpaolunan enerjidən maksimum dərəcədə istifadə etməklə daxili bazarda təbii qaz istehlakını azaltmağa nail ola bilərik. Biz qarşıya qoyulan bütün məqsədlərə nail olmağı bacaran bir ölkəyik. Vaxtilə Cənub Qaz Dəhlizi barədə də müxtəlif fikirlər var idi. Nikbin düşünənlər, bədbin düşünənlər… Həmçinin elələri də var idi ki, düşünürdülər, biz bunu həyata keçirə bilməyəcəyik. Ancaq budur nəticə…Uzunluğu 3500 kilometr olan kəmər artıq arzu yox, reallıqdır. Layihə getdikcə daha çox ölkələri əhatə edir. Çünki bizim təbii qazı yeni təyinat nöqtələrinə nəql etməyə imkan verən yeni interkonnektorlarımız var. Bu baxımdan yaşıl enerji istiqamətində də qurulan planlar və reallaşdırılan layihələr tezliklə öz müsbət nəticəsini verəcək”.
Mikayıl Mirzəzadə
