Azərbaycanın Afrika İttifaqı yanında Daimi nümayəndəsi Elman Abdullayev Afrika İttifaqının siyasi məsələlər üzrə komissarı Aişə Abdullahi ilə görüşüb.
Daimi nümayəndəlikdən AZXEBER.COM-a verilən məlumata görə E. Abdullayev Azərbaycanın regionda lider dövlət olması, ölkəmizin dəstəyi ilə həyata keçirilən humanitar layihələr və regionun inkişafına Azərbaycanın verdiyi töhfələr barədə geniş məlumat verib.
E. Abdullayev komissar Abdullahiyə Ermənistanın təcavüzkar siyasəti və bu təcavüzkar siyasət nəticəsində Azərbaycanın torpaqlarının 20 %-nin işğal olunduğunu, 1 milyondan artıq azərbaycanlının qaçqın və məcburu köçkün olduğunu deyib.
Azərbaycan səfiri Ermənistanın işğalçı siyasətinin beynəlxalq təşkilatlar, xüsusilə BMT Təhlükəsizlik Şurası, Avropa Parlamenti, İslam Əməkdaşlıq Təşkilatı və digər beynəlxalq təşkilatlar tərəfindən dəfələrlə pisləndiyini və müvafiq qətnamələrin qəbul olunduğunu komissarın diqqətinə çatdırıb.
Azərbaycan haqqında ətraflı məlumat verən səfir, ölkəmizin bir çox yüksək səviyyəli beynəlxalq miqyaslı tədbirlərə ev sahiblik etdiyini bildirib və Bakı 2015 ilk Avropa Oyunları barədə danışıb.
Görüş zamanı xanım Abdullahiyə Azərbaycanın dünyanın bir çox ölkələrində həyata keçirdiyi humanitar layihələri, ehtiyacı olan və təbii fəlakətlərlə üzləşmiş ölkələrə etdiyi humanitar yardımlar barədə geniş məlumat verilib.
Azərbaycanın humanitar sahədə çox fəal olmasını yüksək qiymətləndirən Aİ komissarı, ölkəmizin bu sahədəki beynəlxalq fəaliyyəti ilə tanış olduğunu qeyd edib. Görüşdə Azərbaycanla Afrika İttifaqı arasında birgə humanitar layihələrin də həyata keçirilməsinə maraq nümayiş etdirilib.
Səfir E. Abdullayev öz növbəsində Azərbaycanın Afrika İttifaqı ilə əməkdaşlığının yeni müstəviyə qaldırılmasında maraqlı olduğunu deyib.
