"Mir" teleradioşirkəti Azərbaycanın "Eurovision 2012" mahnı müsabiqəsinə necə hazırlaşması ilə bağlı reportaj hazırlayıb. Reportajda iştirakçıları və qonaqları qəbul etmək üçün paytaxtın 500-dən artıq otelinin hazırlıq gördüyündən bəhs edilir. Reportajda mətbəxə xüsusi diqqət ayrılıb. "Eurovision"a 9 ay qalmasına baxmayaraq, otellər qonaqları qarşılamağa artıq hazırdır. Azərbaycan mətbəxinin ləziz təamları müxtəlif növ servislə təqdim olunacaq. Menyunun rəngarəngliyi məqsədilə yerli aşpazlara Asiya mətbəxini öyrətmək üçün bütün otellər və restoranlar Bakıya Asiyadan kulinarlar dəvət edib. Bundan savayı qonaqlara İtaliya və digər ölkələrin yeməkləri təklif olunacaq.Reportajda "Eurovision" üçün xüsusi olaraq hər biri 40.000 dollarlıq 300 yeni taksinin alındığı və müsabiqəyə qədər onların sayının 3 dəfə artırılacağı deyilir. Bu taksilərin sürücüsü olmaq üçün yazılı imtahandan keçmək tələb olunur. Hal-hazırda bu taksilərdə sürücülük edənlər xarici dil bilirlər.Polislər də müsabiqəyə ciddi hazırlaşırlar. Əsas güc sayı 50 minlik tamaşaçı tutumu olan konsert zalının tikintisinə sərf olunur. Xəzərin sahilində inşa edilən konsert zalında akvariumu xatırladan şəffaf səhnə qurulacaq. "Eurovision"a hazırlıqla bağlı Emin Ağalarov da danışıb: "Mən düşünürəm ki, bu "Eurovision" mahnı müsabiqəsi tarixində ən ciddisi olacaq."
Azərbaycanın Maliyyə Nazirliyinin hesablamalarına görə, "Eurovision"a hazırlığa dövlət büdcəsindən milyard dollar xərclənəcək. Müsabiqə üçün bu məbləğin xərclənməsini vətəndaşlar birmənalı qarşılamayıb.
