"Slovakiya və Azərbaycan arasındakı diplomatik əlaqələr 1993-cü ildə qurulub və müstəqillik dövründən bəri sabit inkişaf trayektoriyası çəkib. İki ölkənin parlamentlərarası dostluq qrupları və qarşılıqlı səfərlər siyasi dialoqu gücləndirir. Slovakiya beynəlxalq platformalarda, xüsusilə BMT və Avropa Şurası çərçivəsində Azərbaycanın territorial bütövlüyünü dəstəkləyərək Qafqazda sabitliyə töhfə verib”.
Bu sözləri AZXEBER.COM-a açıqlamasında Politoloq Tural İsmayılov iki ölkə əlaqələrini şərh edərkən deyib.
O bildirib ki, Azərbaycanın iqtisadi və siyasi gücü Avropa İttifaqının enerji siyasətində rolunu artırır:
"Rusiya-Ukrayna müharibəsindən sonra Slovakiya enerji diversifikasiyası strategiyası çərçivəsində Azərbaycana müraciət edib. 2024-cü ildə ticarət həcmi təxminən 145 milyon avroya yaxınlaşaraq Azərbaycan qazının ixracı Slovakiyanın enerji təhlükəsizliyini gücləndirib. Ölkəmizin iqtisadi və siyasi gücü Avropa İttifaqının enerji siyasətində Azərbaycanın rolunu artırır. Ticarət həcminin artması ilə paralel olaraq slovak şirkətləri Azərbaycanın bərpa layihələrində iştirak edir. İnfrastruktur, tikinti və quruculuq sahələrində qarşılıqlı investisiyalar gələcək illərdə sürətlənəcək. Bu əməkdaşlıq "qazan-qazan" prinsipinə əsaslanır və hər iki ölkənin iqtisadi dayanıqlığını yüksəldir”.
Ekspert qeyd edib ki, təhsil sahəsində də iki ölkə arasında əməkdaşlıq mövcuddur:
"Təhsil sahəsində Slovakiya qrantları Azərbaycan tələbələrinə açıqdır, mübadilə proqramları gənc nəslərin dialoqunu artırır. Mədəni tədbirlər və səyahət agentliklərinin əməkdaşlığı xalqlar arası etimadı möhkəmləndirir. Bu sosial bağlar siyasi və iqtisadi əlaqələri tamamlayır”.
"Yaşıl enerji və rəqəmsal transformasiya sahələrində yeni fürsətlər açılacaq. Slovakiya-Azərbaycan əlaqələri Orta Avropa ilə Qafqaz arasında strateji körpü rolunu oynayaraq qlobal dəyişikliklərdə sabitlik amili yaradır. Gələcək investisiyalar və diplomatik dialoq bu münasibətləri daha da dərinləşdirəcək”-, deyə politoloq vurğulayıb.
Şahanə Ziyad
