Azərbaycan təhsilində biabırçılıq: 63 faiz tələbə keçid balını yığa bilmədi

Əjdər Ağayev: “Abituriyentlərin cavablarını məqbul hesab edirəm. Nəticələr gözlənilən oldu. Uğurlu nəticələr var. İldən-ilə qəbul imtahanlarında yüksək bal toplayanların sayı artır. Bu da təhsilimizin uğurudur. Abituriyentlərin intellektual səviyyələri artıb.

O ki qaldı 700 bal toplayan abituriyentlərin sayının artmasına, hesab edirəm ki, uşaqlar daha çox oxuyub, öz üzərində yaxşı hazırlaşıb uğur qazana bilirlər. Ümumi səviyyə yüksəlib, nəticədə də bu ilki göstəricilər ürəkaçan oldu”.

Rafiq İsmayıl: “Qəbul imtahanlarında abituriyenlərin göstəriciləri hər il aşağı düşür. Bu vəziyyətdən çıxmaq üçün qəbul ballarını aşağı salırlar. Bu da təhsilin səviyyəsinin aşağı düşməsinə səbəb olur. Bilik almaq istəyən övladlar çoxdur. 700 bal toplayanlar əvvəldən oxuyub və qazandıqları uğur illərlə çəkdikləri əziyyətlərinin nəticəsidir. Özlərinin və ailələrinin köməyi ilə bu nəticəni əldə alırlar.

Etiraf etmək lazımdır ki, müntəzəm, nizamlı qaydada təhsil yoxdur. Şagirdlər repetitorların yanında hazırlaşırlar. Təhsil sisteminin özündə müntəzəmlik sistemlilik olmadığı üçün, ümumi yüksək nəticə əldə etmək mümkün olmur”.

Kamran Əsədov: “İmtahanların nəticələri acınacaqlı mənzərə ortaya çıxardı. Təəssüflər olsun ki, 31397 abituriyentdən cəmi 11406 nəfəri keçid balını— 200 balı keçə bilib. Bu, əlbəttə ki, biabırçı bir nəticədir. Müsabiqə şərtlərini 11406 abituriyent ödəsə də, qəbul plan yeri dəfələrlə çox— 13632-dir. Deməli, abituriyentlər düzgün ixtisas seçimi etsələr, 1-ci ixtisas qrupu üzrə müsabiqəyə buraxılan abituriyentlərin hamısı ali məktəblərə qəbul olacaq və hətta 2 mindən çox plan yeri boş qalacaq.

1-ci ixtisas qrupu üzrə sənəd təqdim edən abituriyentlərin bir çoxu həm də 5-ci ixtisasa sənəd verib, deməli 1-ci qrupda boş qalan plan yerlərinin sayı daha da çox olacaq. 4-cü qrup üzrə 5340 abituriyent sənəd qəbulunda iştirak edib, onlardan 2823-ü müsabiqə şərtlərini ödəyərək ixtisas seçiminə buraxılıb. Yəni 50 faizdən çox abituriyent 200 balı toplaya bilməyib.

Burda bir məsələ var ki, hər iki ixtisas qrupundan, 1 və 4 cü qrupdan 3 abituriyent maksimum nəticə, 700 bal toplayıb. Bu, heç də abituriyentlərin yüksək göstəricisi demək deyil. Bu, qəbul imtahanlarında istifadə olunan test tapşırıqlarının mayda keçirilən imtahandan dəfələrlə asan olması ilə əlaqədardır. 31 min abituriyentdən yalnız min nəfəri 500 balı keçə bilib. 400-700 bal arası nəticə göstərən abituriyentlərin sayı cəmi 1636 nəfərdir ki, bu da 31 min abituriyentin qarşısında bərbad bir nəticənin olduğunu göstərir. Hesab edirəm ki, 1 və 4-cü qruplar üzrə imtahan nəticələri əvvəlki illərdə olduğu kimi, çox aşağı səviyyədədir. Təəssüflər olsun ki, imtahan nəticələri ildən-ilə irəli getməli olduğu halda, ya yerində sayır, ya da geriyə doğru hərəkət edir”.

Nadir İsrafilov: “Vəziyyət heç də ürəkaçan deyil. Hələ də Sovet hakimiyyətinin təhsil sistemindən çıxmaq üçün dəfələrlə yeni qaydalar reallaşdırmağa çalışırıq. Hər dəfə də yeni qaydanın tətbiqi təhsil sistemində problemlər ortaya çıxarır.

Hazırda çox sayda özəl universitetlərin olması tələbə qəbulu zamanı rəqabəti azaldır. Ümumiyyətlə, çox sayda universitetin olması diplom verərək, “ali savadlı”ların sayının artmasına səbəb olur. Amma bir problem ortaya çıxır: ali savadlı gənclər işlə təmin olunurmu? Mən daha çox özəl universitetdənsə, az sayda peşə məktəblərinin olmasının tərəfdarıyam”.