Azərbaycan və Rusiya arasında malların mənşə sertifikatlarının elektron sistemlərinin yaradılması istiqamətində işlər yekun mərhələdədir.
AZXEBER.COM "Report”a istinadən xəbər verir ki, bunu Rusiya Federal Gömrük Xidmətinin (FGX) Azərbaycandakı nümayəndəsi Ruslan Ştıka Bakıda keçirilən "Avrasiyanın nəqliyyat karkasının formalaşması və Azərbaycanın bu prosesdə əhəmiyyətli rolu" mövzusunda beynəlxalq dəyirmi masada bildirib.
"Bu, iki ölkənin gömrük orqanlarına ST-1 formalı sertifikatların həqiqiliyini və onlarda əks olunan məlumatların doğruluğunu elektron şəkildə yoxlamağa imkan verəcək. Bu zaman xarici iqtisadi fəaliyyət iştirakçılarının bu məlumatları kağız daşıyıcılarda təqdim etməsinə ehtiyac olmayacaq.
"ST-1 formalı sertifikat qarşılıqlı ticarətdə azad ticarət rejimi çərçivəsində preferensiyaların tətbiqi hüququnu təsdiqləyən əsas sənəddir. O, həm Rusiyada, həm də Azərbaycanda gömrük rəsmiləşdirilməsi zamanı geniş istifadə olunur", - R.Ştıka qeyd edib.
Onun sözlərinə görə, tərəflər prosedurları sadələşdirmək üçün hökumətlərarası protokol imzalayıblar. Bu protokola əsasən Azərbaycanın ST-1 sertifikatları Prezident yanında Antiinhisar və İstehlak Bazarına Nəzarət Dövlət Agentliyi vasitəsilə Rusiya tərəfinə elektron formada ötürüləcək.
"Perspektivdə bu məlumatlar birbaşa Ticarət-Sənaye Palatasından daxil olacaq ki, bu da avtomatlaşdırılmış yoxlamanı həyata keçirməyə imkan verəcək. Biz sadəcə skan edilmiş surəti deyil, ilk mənbədən məlumatları alırıq, sistem bunları müqayisə edə və müfəttişə "yaşıl işarə" verə bilər", - o izah edib.
R.Ştıka əlavə edib ki, layihənin texniki şərtləri artıq imzalanıb və hazırda sistemin rəsmi qaydada işə salınma tarixi razılaşdırılır. Elektron verifikasiyanın tətbiqindən sonra Rusiya tərəfi ST-1 formalı kağız sertifikatlarının tələb edilməsindən imtina edəcək və ya texniki nasazlıqlar halında belə halları minimuma endirəcək.
