Azərbaycan xalqının tarixində elə səhifələr var ki, onları yalnız rəqəmlərlə, tarixlərlə və siyasi hadisələrlə izah etmək mümkün deyil. Bu səhifələr xalqın iradəsini, birliyini, Vətən sevgisini və dövlətçilik əzmini özündə əks etdirir.
30 ilə yaxın davam edən işğal dövrü Azərbaycan xalqı üçün ağır sınaq oldu. Lakin xalqımız öz torpaqlarının işğalı ilə heç vaxt barışmadı. Şəhidlərimizin qanı, qazilərimizin fədakarlığı və hərbçilərimizin qəhrəmanlığı hesabına Azərbaycanın ərazi bütövlüyünün və suverenliyinin bərpası mümkün oldu.
Bu gün işğaldan azad edilmiş ərazilərdə Azərbaycan Bayrağının dalğalanması həmin mübarizənin nəticəsidir. Qarabağ və Şərqi Zəngəzurda aparılan genişmiqyaslı quruculuq və bərpa işləri isə xalqımızın öz doğma torpaqlarına qayıdışının real göstəricisidir.
Prezident İlham Əliyev müsəlman dini qurumlarının təmsilçilərini qəbul edərkən bu məsələlərə toxunaraq Azərbaycanın öz hüquq və ədalətini bərpa etdiyini bildirib.
Dövlət başçısının sözlərinə görə, Azərbaycan xalqı qan tökərək və döyüşərək torpaqlarını azad edib. Şəhidlərimizin canı-qanı, qəhrəman övladlarımızın fədakarlığı hesabına milli ləyaqətimiz və hüquqlarımız bərpa olunub.
Bu mübarizənin ən mühüm nəticələrindən biri də separatçılığın sona çatdırılması və Azərbaycanın bütün ərazisində dövlət suverenliyinin təmin olunmasıdır.
Lakin torpaqlarımıza qayıdış zamanı qarşılaşdığımız mənzərə işğalın yalnız ərazilərimizin itirilməsi ilə məhdudlaşmadığını bir daha göstərdi. Dağıdılmış şəhərlər, kəndlər, yaşayış evləri, talan edilmiş sərvətlər və dini abidələr illər ərzində törədilən dağıntıların miqyasını ortaya qoydu.
Prezident İlham Əliyev çıxışında 65 məscidin Ermənistan dövləti tərəfindən tamamilə dağıdıldığını bildirib. O, həmçinin bəzi məscidlərin yarıdağıdılmış vəziyyətdə olduğunu və bir sıra dini məkanlarda heyvan saxlanıldığını qeyd edib.
Bu faktlar Azərbaycan üçün təkcə dağıdılmış tikililər məsələsi deyil. Məscidlər, dini ocaqlar və digər tarixi abidələr xalqımızın milli-mənəvi yaddaşının bir hissəsidir. Onların dağıdılması ilə yanaşı, həmin irsin qorunması və gələcək nəsillərə çatdırılması da mühüm məsuliyyətdir.
Bu gün Qarabağ və Şərqi Zəngəzurda aparılan bərpa işləri məhz bu baxımdan xüsusi əhəmiyyət daşıyır. Dağıdılmış yaşayış məntəqələri yenidən qurulur, tarixi və dini abidələr bərpa edilir, insanlar doğma yurdlarına qayıdır.
Azərbaycan xalqının keçdiyi yol göstərir ki, milli birlik və dövlətçilik iradəsi ən çətin sınaqların belə öhdəsindən gəlməyə imkan verir. Şəhidlərimizin xatirəsini yaşatmaq, qazilərimizin fədakarlığını unutmamaq və əldə olunan tarixi nəticələri qorumaq hər birimizin məsuliyyətidir.
Bu gün əsas vəzifələrdən biri də gələcək nəsillərə baş verənləri düzgün çatdırmaqdır. Çünki tarix yalnız kitab səhifələrində deyil, bərpa olunan şəhərlərdə, yenidən ucaldılan məscidlərdə, doğma torpağına qayıdan insanların həyatında da yaşadılır.
Azərbaycan xalqının bir yumruq kimi birləşərək əldə etdiyi bu nəticə milli iradənin, Vətən sevgisinin və dövlətçilik əzminin tarixə yazılmış mühüm nümunələrindən biridir.
Müəllif: Pərvin Rəhimli
Göygöl MKTİB-nin rəisi, Vətən müharibəsi iştirakçısı
