Azərbaycanın şimalındakı Qırmızı Qəsəbə adambaşına düşən milyarderlərin sayına görə bütün postsovet məkanında şəriksiz liderdir. Belə ki, 3 min sakini olan qəsəbədən iki milyarder çıxıb - Zarah İliyev və Qod Nisanov.
"Forbes" jurnalının rus redaksiyası həmin qəsəbədən reportaj hazırlayıb.
Məqalənin "Turan" agentliyi tərəfindən yayılan xülasəsində deyilir ki, Zarah İliyev və Qod Nisanov burada - Bakıdan cəmi 168 km aralıda yerləşən Qubada doğulublar. Hər iki qubalı yəhudi Moskvada nəhəng daşınmaz əmlak sahibləridir. “Ukrayna” və “Radisson Slavyanskaya” otelləri, “Avropa” ticarət mərkəzi, “Sadovod”, “Moskva”, “Lotos Sity” topdansatış və pərakəndə ticarət kompleksləri onlara məxsusdur. Onlar hazırda Moskva-Sity-də göydələnlər tikir və Ümumrusiya Sərgi Mərkəzini bərpa edirlər.
Nisanovla İliyevin uğurunun sirlərindən biri diaspora söykənmələridir. Qırmızı Qəsəbədə əsasən İrandan Qafqaza gəlmiş dağ yəhudiləri, özü də kompakt halda yaşayır. Bu xalqın tarixinin öyrənilməsi, diyarşünaslıq muzeyinin yaradılması, qəsəbə üçün əhəmiyyətli olan digər layihələr Moskvada varlanan bu iki binnesmen tərəfindən maliyyələşdirilir.
“Qod Nisanovun atası da xeyriyyəçi idi. O, Qubadakı konserv zavoduna rəhbərlik edir və çox adama yardım göstərirdi. İqtisadiyyatdan da yaxşı başı çıxırdı” - deyə Azərbaycan parlamentinin üzvü Yevda Abramov bildirir.
“İndi yüksək mənsəb tutmalarına baxmayaraq həm Qod Nisanov, həm də qardaşı Lev çox sadə adamlar idi. Qod uşaqlar arasında öz liderliyi ilə seçilirdi. Lev isə bir qədər sakit uşaq idi. Amma ikisi də çox qabiliyyətli idilər” - deyə keçmişdə məktəb direktorunun müavini olan, hazırda isə qəsəbənin icra nümayəndəliyinə rəhbərlik edən Psax İsakov xatırlayır.
Qod Nisanovun qardaşı Lev və uşaqlıq dostu German Zaxaryayev hazırda milyarderin biznesinin idarəçiliyi ilə məşğuldurlar.
Virtualaz.org
