Milli Məclisin deputat Fazil Mustafaya qarşı ötən gün - martın 28-i saat 21:51 radələrində paytaxtın Sabunçu rayonu, Zabrat-1 qəsəbəsi, Babək küçəsi ev 2 "Z” ünvanında "Kalaşnikov” avtomat silahından atəş açılaraq terror aktı törədilib.
Nəticədə F. Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilib.
Azərbaycan dövlət müstəqilliyi əldə etdikdən sonra bir neçə vəzifəli şəxs sui-qəsdə məruz qalıb.
AZXEBER.COM həmin şəxslərlə bağlı xatırlatma edir:
1991-ci il noyabr ayının 20-də Xocavənd rayonunun Qarakənd kəndinin yaxınlığında, Ağdam rayonunun Mərzili kəndi ərazisində erməni hərbi dəstələri tərəfindən vurulan Azərbaycan hərbi helikopterində olan çoxsaylı iriçaplı məmurlar - Dövlət katibi Tofiq İsmayılov, baş prokuror İsmət Qayıbov, dövlət müşaviri Məhəmməd Əsədov, baş nazirin müavini Zülfü Hacıyev, Prezident Aparatının şöbə müdiri Osman Mirzəyev, millət vəkilləri Vaqif Cəfərov və Vəli Məmmədov, Azərbaycan Dövlət Televiziyasının jurnalisti Alı Mustafayev və ümumilikdə 22 nüfuzlu şəxs sui-qəsdə məruz qalaraq ölüb.
Gəncə şəhər İcra Hakimiyyətinin sabiq başçısı Vaqif Vəliyev (Hacı Vaqif) 1993-cü ildə öz iş otağında qətlə yetirilib. Hadisəni törədən şəxs məhkəmənin qərarı ilə 15 il müddətinə azadlıqdan məhrum edilib.
Milli Məclisin sədr müavini Afiyəddin Cəlilov 1994-cü il sentyabrın 29-da Bakıda yaşadığı binanın blokunda sui-qəsd nəticəsində qətlə yetirilib.
Prezident yanında Xüsusi İdarənin rəisi Şəmsi Rəhimov da 1994-cü il sentyabrın 29-da Bakıda sui-qəsd nəticəsində qətlə yetirilib.
Milli Məclisin deputatı, Yeni Azərbaycan Partiyasının sədr müavini, Azərbaycan şərqşünası, görkəmli alim, akademik Ziya Bünyadov 21 fevral 1997-ci ildə, axşam saat 18:10 radələrində yaşadığı binadan çıxarkən bıçaq və odlu silahdan açılan atəşlə qətlə yetirilib. Ziya Bünyadov qətl ediləndə 75 yaşı var idi.
Jurnalist, "Monitor” jurnalının redaktoru c 2005-ci il martın 2-də öz evinin kandarında 7 güllə ilə qətlə yetirilib.
Müdafiə nazirinin müavini, Hərbi Hava Qüvvələrinin və Hava Hücumundan Müdafiə Qoşunlarının komandanı Rail Rzayev 11 fevral 2009-cu ildə Bakıda sui-qəsd nəticəsində qətlə yetirilib.
Yazıçı-filosof, həkim-kardioloq Rafiq Tağın 2011-ci il noyabr ayının 19-da naməlum şəxs tərəfindən bıçaqlanıb. Bir neçə bıçaq yarası alan yazıçı xəstəxanaya yerləşdirilib, əməliyyat olunub. Lakin 4 gün sonra müalicə aldığı xəstəxanada vəfat edib.
2018-ci il iyulun 3-də, saat 20.30 radələrində Gəncə Şəhər İcra Hakimiyyətinin başçısı Elmar Vəliyev və onun mühafizəçisi Qasım Aşbazov İcra Hakimiyyətinin inzibati binasının qarşısında naməlum şəxsin odlu silahdan açdığı atəş nəticəsində müxtəlif dərəcəli bədən xəsarətləri almış və xəstəxanaya yerləşdirilmişdi. Cinayəti törətmiş 1983-cü ildə Gəncə şəhərində anadan olmuş Yunis Səfərov dərhal həmin ərazidə xidmət aparan polis əməkdaşları tərəfindən tutulub tərksilah edilmişdi.
Aydın Nuri
