Azərbaycanda yeni televiziyanın, “MuzTV” telekanalının rəsmi açılışı olub. AZXEBER.COM-un məlumatına görə, kanalın baş direktoru tanınmış jurnalist Vüsalə Kərimovadır. V. Kərimova deyib ki, 24 saat fəaliyyət göstərən yeni telekanal həm internet, həm də peyk vasitəsilə yayımlanır. Kanalın direktoru telekanalda hər gün Azərbaycanın hit kliplərinin, klassik əsərlərin, reportajların, sənətçilərə, müğənnilərə həsr olunan verilişlərin nümayiş olunduğunu deyib. Hazırda verilişlərin aparıcısız təqdim olunduğunu bildirən kanal direktoru gələn həftədən etibarən aparıcıların da efirdə görünəcəyini qeyd edib: “Aparıcılar arasında tanınmış simalar yoxdur. Əsasən, yeni kadrlardan ibarət olacaq yaradıcı heyət efir üzü görməyən şəxslərdir. Müəyyən məşqlər gedir. Gələn həftədən etibarən efirdə görünəcəklər”. Kanalın əsas aparıcı xəttinin musiqinin təbliğatı olacağını deyən Vüsalə Kərimova burada ancaq şou verilişləri, konsertlərin, müğənnilərin solo konsertlərinin yayımlanacağını qeyd edib.
