Son bir həftədə Azərbaycanda yumurtanın qiyməti 25-30 faiz artıb. Ötən həftə 10 qəpiyə satılan yumurta indi 12-13 qəpiyə təklif edilir. Alıcılar deyir ki, qiymət artımı qısa müddətdə baş verib. Yumurtanın Ramazan bayramı ərəfəsində bahalaşması isə alıcıları narazı salıb.
Pərakəndə satış məntəqələrində satıcılar deyir ki, son 3-4 gündə yumurtanın alış qiymətində 1-2 qəpik artım var. Əvvəllər olduğu kimi indi də onlar məhsulun qiymətinin üstünə 1-2 qəpik qoyub satırlar.
«Əvvəllər 9 qəpiyə gəlirdi. Biz 10 qəpiyə satırdıq. İndi 10 qəpiyə gəlir biz də üstünə 1-2 qəpik qoyub satırıq»,- deyə satıcı Ceyhun Quliyev bildirib.
Yumurtanın qiymətinin mövsümlə əlaqədər bahalaşması da inkar olunur. Bəzi satıcılar bildirir ki, belə bir səbəb olsaydı, kənd yumurtalarının da qiyməti qalxardı. «Kənd yumurtası əvvəllər də olduğu kimi 20 qəpikdir»,- deyə satıcı Vaqif Seyfullayev bildirib.
Ölkədə fəaliyyət göstərən quşçuluq fabriklərində isə istehsal qiymətlərinin artmadığını bildirirlər. Quşçular Cəmiyyətinin sədri Aydın Vəliyev deyir ki, əvvəllər olduğu kimi fabriklərdə yumurtanın topdansatış qiyməti 7 qəpikdir.
Aydın Vəliyevin dediynə görə, indi müəssisələr tam gücü ilə işləyir və məhsul qıtlığından söhbət gedə bilməz. «İndiki qiymət artımı bazardakı işbazların əməlidir. Bayram ərəfəsində yumurtaya tələbatın artmasından istifadə edib qiymətləri süni şəkildə qaldıranlar var. Bəzi adamlar var ki, onlar topdansatış obyektlərindən götürüb mağazalara paylayır, qiymətləri qaldırırlar»,- deyə Aydvn Vəliyev vurğulayıb.
Kənd Təsərrüfatı Nazirliyinin şöbə müdiri Çingiz Fərəcov isə hesab edir ki, iyuldan başlayaraq toyuqların yumurtalaması zəifləyir, bu da istehsalın aşağı düşməsinə təsir edir. İstehsalın azalması və tələbatın çoxalmasından istifadə edən bəzi işbazlar qiymətləri artırmağa cəhd edir. Antinhisar Xidmətindən isə bildirirlər ki, quşçuluq məhsulları bazarında qiymətlərə nəzarət olunur. Hələlik aparılan monitorinqlər nəticəsində süni qiymət artımı halları qeydə alınmayıb. Məlumat üçün bildirək ki, hər il Azərbaycanda 1 milyard ədəd yumurta yeyilir. Ölkənin yumurtaya olan tələbatının 90 faizə qədəri yerli istesal hesabına ödənilir.
